not difficult to start but to go on

အစပြုရန်မခက်ပါ၊ ရှေ့ဆက်ဖို့ရန်သာ ခက်ပါသည်

ကျွန်တော်တို့ပတ်ဝန်းကျင်မှာ လူတော်တော်များများက အလုပ်တခုကို စတင်လုပ်ဆောင် တတ်ကြသော်ငြားလည်း ဆက်လက်ပြီး ကြိုးစားအားထုတ်ကာ အစပြုခဲ့သည့်အရာကို တန်ဖိုးထားလျက် မဆုတ်မနှစ် ရှေ့ဆက် (carry on) လုပ်ဆောင်ရန် ပျက်ကွက်ကြတာကို တွေ့နေရပါတယ်။

ဥပမာ၊ Facebook Page တခုဖွင့်ပြီး အွန်လိုင်းကနေ ဝင်ငွေရှာမယ်၊ ဒါမှမဟုတ် အများကောင်းကျိုး လုပ်ဆောင်မယ် စသည်ဖြင့် စိတ်ကူးစိတ်သန်း အလန်းတွေနဲ့ Facebook Page (or) Facebook Group တွေဖွင့်ကြပါတယ်။ သို့သော်လည်း တကယ်ပဲ ဝရိယစိုက်ထုတ်မှု (Commitment) အပြည့်နဲ့ အောင်မြင်အောင် လုပ်ဆောင်သူက နည်းပါးလှပါတယ်။ သတင်းနဲ့ အချက်အလက်များကို အများပြည်သူ အကျိုးအလိုငှါ ဖြန့်ဝေမယ်လို့ စတင်လုပ်ဆောင် ခဲ့ကြသော်ငြားလည်း နောက်ဆုံးမှာတော့ အတင်းအဖျင်း၊ သတင်းတု သတင်းမှားတွေနဲ့ အဆုံးသတ် သွားတတ်ကြပါတယ်။

သမီးရည်းစား အဆင့်က တာဝန်ထက် အိမ်ထောင်မှုက ပိုပြီး တာဝန်ရှိလာပါတယ်။ တူနှစ်ကိုယ် တဲစုတ်ကလေးထဲမှာ ပျော်ပါတယ် ဆိုတာက စားအိုးကြီးလာတဲ့အခါ သိပ်မမှန်တော့ပါဘူး။ ဘာလို့ဆိုတော့ နှစ်ယောက်တစ်အိမ်မက် မှမဟုတ်တော့တာ၊ အခုက ရှစ်ယောက် တအိမ်မက်လောက် ဖြစ်နေပြီလေ။ အိမ်ထောင်တခုကို စတုန်းက စခဲ့ပြီးမှ အခုမှ နောင်တရတယ်တို့ ဘာတို့ ကိုယ့်မိန်းမ ကြားအောင် သွားမဟမိလေနဲ့။ ဟိုကလည်း ဘယ်နေမလဲ။ နင့်အရင် သုံးယောက်မြောက် ရည်းစားကို ငါလက်ထပ်ခဲ့ရင် အခုသူ့တိုက်နဲ့ကားတွေ ငါ့ဟာ ဖြစ်မှာ ဆိုပြီး ပြန်ဆော်လိုက်မှ ဟုတ်ပေ့ ဖြစ်နေမယ်။

ဒါတင် ဘယ်ပြီးအုံးမလဲ။

ဗိုက်က အဆီခေါက်ကြီးကို စိတ်နာနာနဲ့ MC က တင်ဆက်တဲ့ နန်းခင်ဇေယျာ လုပ်ပြတဲ့ လေ့ကျင့်ခန်းလေး အားကျလို့ ကိုယ်လည်း တတ်သလောက် မှတ်သလောက် လုပ်ကြည့်လိုက်တာ ခုနှစ်ရက် ကြီးများ‌တောင် ရှိလာပြီ၊ ဘာမှမထူးသေးပါဘူး။ ကိုယ့်ဗိုက်ခေါက်ကြီးကို ကိုယ်ပြန်ကြည့်ပြီး၊ ဟင်.. ဘာမှလည်း ဖြစ်မလာဘူး လို့ နောက်ဆုံးတကြိမ် ညည်းလိုက်ပြီး နဂို စားနေကျ အိပ်နေကျ အချိန်ဇယားလေး အတိုင်းပဲ ပြန်နေလိုက်တယ်။ ဆန္ဒကို ဝရိယမကူတော့ .. ဟင်၊ ပိုတောင် ဝလာသလား ထင်ရတယ်။

ဘဝကို အဲလိုမျိုး ကျောက်နံရံကို ပန်းနဲ့ ပေါက်သလို သွားလုပ်လို့ကတော့၊ အင်း.. ဖြစ်အုံးမယ် အားကြီးကြီး။ ဒါ့ကြောင့် သေချာအောင် ဒယ်အိုးကိုယ်တော် လေသံနဲ့ အရင်မေးပါရစေ။

ဟုတ်ပလား၊ သဘောပါသလား၊ သေချာသလား။

ဟုတ်ပါတယ်။ ဘဝမှာ ဘာလုပ်လုပ် သေချာမှ၊ ခိုင်မာမှ၊ တကယ်‌ဆန္ဒရှိပြီဟေ့၊ ပိုက်ဆံမကုန်တဲ့ ဝရိယကိုတော့ ဒလဟော သွန်ချ အားထုတ်တော့မယ်ဟေ့ ဆိုမှ စတင်လုပ်ဆောင်ပါ။ အလွယ်တကူ စလုပ်ပြီးကာမှ လမ်းတဝက် ‌ရောက်မှ အချဥ်ပေါင်းထုပ် မစားချင်ဘူး၊ လတ်လတ်ဆတ်ဆတ် ရှောက်သီးသုပ်ပဲ စားတော့မယ် တော့ မလုပ်ကောင်းပါဘူး။ ဘဝမှာ တချို့ကိစ္စတွေက အချဥ်ပေါင်း တခုမကြိုက်လို့ နောက်တခု အလွယ်တကူ ပြောင်းလဲ ဝယ်စားလို့ ရသလိုမျိုး လွယ်လွယ် ပြန်ပြောင်းမရလို့ ဖြစ်ပါတယ်။

ဒါ့ကြောင့် ဘာပဲ လုပ်လုပ်၊ ဘာပဲ စဥ်းစား စဥ်းစား သေချာပြီလား၊ တကယ် ဖြစ်ချင် လုပ်ချင်တာလား၊ မစုတ်မနှစ် လုပ်မှာလား စတာတွေကို ကိုယ့်ကိုကိုယ် အရင်မေးသင့်ပါတယ်။ သေချာပြီ ဆိုရင်တော့ .. နန်းတော် ရောက်ရောက်၊ သင်္ချိုင်းရောက်ရောက် လုပ်တော့။

နောက်ဆုံးအနေနဲ့ လေးဖြူ ရဲ့ မင်းမှမင်းပဲ ဆိုတဲ့ သီချင်းလေး လိုက်ညည်းကြည့် လိုက်ပါအုံး။

Scroll to Top