Peter le Cornelius
10
1 Khumin Ceasarea khuo-ah Italy Galkapte a kici lahah mi zakhat a uh Cornelius min nei galkapmang khat a om hi.
2 Ama pen a innkuonpite tawh biehna lama kipumpieh Pasien a zatah mi khat ahi hi; ama in kiphaltahin mite tungah huna pie-in Pasien kungah thu ngen den hi.
3 Ama in nitah nai thum pawlin mang mu a, Pasien’ vantungmi khat pei-in ama kungah “Cornelius aw,” ci-in a hopina kicientahin a mu hi.
4 Ama in a zau kawmin tua pa encien a, “Bang ahei Topa?” a ci hi. Ama in, “Na thungetna le na kipiehnate, a kiphawh zing dingin Pasien mai-ah tungto zo hi.
5 Tu-in Joppa khuo ah mi sawl inlen a min Peter kici Simon hlansah in.
6 Ama pen tuipi gei-a teng savun bawlpa Simon inn ah a tung hi,” a ci hi.
7 Ama a hopi vantungmi a peikhiet zaw ciengin ama’ silate mi ni le ama’ na sem a galkapte lahah Pasien lamah a pawnthaw galkap khat hlan a,
8 ama in amate kungah thu zosie a gen zaw ciengin Joppa khuo ah a sawl hi.
9 A zing ni ciengin amate khuol a zin vua, khuopi a tun kuon uh sunkim pawl ciengin thungen dingin innkhumzang ah Peter kato hi.
10 Peter a gilkielin bangkhat a ne nuom hi; tuale an a kihuon laitahin Peter haitu pah a, mang khat a mu hi.
11 Van kihong a, tuale ama in a pheng golpi khat tawh a kibang na khat ang kumsuhin a ningli tawh leitunga ang kikhiehsuh a mu hi.
12 Tua sungah kengli a nei ganhing namcin, a awm tawh a kithol ganhing namcin, le vana a leng va namcin a om hi.
13 Tua ciengin, “Peter aw, tho inlen tuate go-in ne in,” a ci aw khat a za hi.
14 Hizongle Peter in, “Topa aw, hi thei lo ding hi; azieh pen a bua le a sieng lo na khat popo ka ne ngai malmal sih hi,” a ci hi.
15 Tua aw in ama a niveina hopi a, “Pasien in a sienga a bawlsate a bua ci paupau sin,” a ci hi.
16 Thumvei dongin tua bangin pieng a, khum zaw ciengin vantung lamah tua sil a kilato kia ta hi.
17 Tua a mang muna pen bang a cinopna hi ding ahei, ci-in Peter a lungman mama laitahin Cornelius’ sawl mite in Simon’ inn a kan kawikawi vua, tunkot gei-ah thakhatin a ding uhi.
18 Tua munah Peter a kici Simon a tung ei mah, ci-in amate in a galdawh uhi.
19 A mang muna thu Peter in a ngaisut laitahin Hlagau in ama kungah, “En in, mihing thuma in nang ang sui uhi.
20 Tu-in tho-in kumsuh inlen uoikai loin amate tawh zawh in; azieh pen amate keima’ ang sawl ahi hi,” a ci hi.
21 Tua mite kungah Peter peisuh a, “Na sui pa uh keima ka hi hi; bang dinga tana hing pei na hi uh ahei?” a ci hi.
22 Amate in, “Nangma’ thugen ngai dingin Pasien a giing, Judah minam zosie in a zatah, mi zakhat a uh galkapmangpa Cornelius in ama’ inn ah nang ang hlan dingin vantungmi siengtho khat in thu pie zo hi,” ci-in a dawng uhi.
A zing ciengin tho-in amate tawh a peiton a, tuale Joppa panin zong thu um mitec pawlkhat in ama a zui uhi.
24 A zing ciengin Ceasarea khuo a tung uhi. Amate tun ding a lamet ziehin Cornelius in a hieng a san le a lawm a guolte na hlan hi.
25 Peter a tun ciengin Cornelius in ama na dawn a, a keng phungah bawhin a bie hi.
26 Ahi vangin Peter in ama phongto a, “Ding in; kei zong mihing ka hi lel bo hi,” a ci hi.
27 Ama tawh a kiho kawmin inn sungah Peter a lut leh a kikhawm mi tampi a mu hi.
28 Peter in amate kungah, “Judah mi khat adingin Gentile mi khat tawh kigop ding le kikawm ding pen thukham tawh kituoh lo hi, ci noma ma in na theisa uh ahi hi; ahi vangin mi khatpo a bua hi, ahi sihle a sieng lo ahi hi, ka ci lo nadingin Pasien in keima tungah ei lah zo hi.
29 Tuaci’n kei ei kihlat ciengin niel loin ka pei hi, tu-in note in bang dinga nei hlat uh ahiei?” a ci hi.
30 Cornelius in, “A tawpsa ni li lai tu bang hun nai thumin ka inn sungah thu ka nget laitahin puonpah a sil pasal khat thakhatin ka mai-ah ang ding hi.
31 Ama in, “Cornelius aw, na thungetna kiza zo a, Pasien mai-ah na kipiehnate zong kiciemte zo hi.
32 Tua ahi ziehin Joppa ah mi sawl inlen, Peter a kici Simon va sui sah ta’n; tuipi gei-a teng savun bawlpa Simon inn ah ama a tung hi,” ei ci hi.
33 Tua ahi ziehin ke’n zong nang ang hlan dingin mi kang sawl pai a, nang pei thei ziehin hoi mama hi. Tuaci’n Topa in na gen dinga ang sawl thu zosie a ngai dingin tu-in Pasien mai-ah ka om uhi,” a ci hi.
Gentile-te in Lungdamna Thu Za
34 Tua ciengin amate kungah Peter thu gen a kipan hi: “ Pasien in mi khentuom nei lo hi, ci thu ka thei tahtah a,
35 ama in minam zosie lahah ama giingin dihtaha a gamta mite a sang hi.
36 Ama in Israel mite tunga thu a na puoh, Jesu Khris zieha a kigen kilemna thu note in na thei uhi. Ama pen mi zosie’ Topa ahi hi.
37 John in baptize-na thu a gen zaw ciengin Galilee gam panin Judea gam zosie-ah tua thu a kizel hi:
38 Pasien in Hlagau Siengtho le vanglietna tawh Nazareth mi Jesu sathau a nu hi; ama pei kawikawi-in na hoi a sem a, dawi mangpa’ bawlsiet mi zosie a damsah hi, azieh pen ama tawh Pasien a omton hi.
39 Judah gam sung le Jerusalem khuo sunga ama’ bawl na zosie-ah kote teci ka hi uhi. Amate in sing tungah ama khai-in a that uhi.
40 Hinanle a ni thum ni-in Pasien in ama thosahkia-in mi tungah ama kilahsah a,
41 mi zosie tungah hi loin, misite panin ama a thawkia zaw ciengin Pasien in teci dinga ei teelsa, ama tawh an neton tuidawnton kote mai-ah ama ang kilah hi.
42 Ama pen misite le a hinglai mite thu khen dingin Pasien in a sekhol pa ahi hi, ci thu mite tunga tangko ding le teci pang dingin Pasien in kote thu ei pie zo hi.
43 Ama a um tapo in ama’ min ziehin mawmaina a nga ding uhi, ci-in kamsang zosie in ama thu teci a pang zo uhi,” a ci hi.
Gentile-te in Hlagau Siengtho Sang
44 Peter in tam thu a gen laitahin tua thu a za mi zosie tungah Hlagau Siengtho a tung hi.
45 Peter tawh a zawhton a tep kitan thu um mite in Gentile-te tung nangawnah Hlagau Siengtho letsong a kibuoh ciengin lamdang a sa mama uhi.
46 Azieh pen tua mite kam tuomtuom tawh hamin Pasien’ min a phat uh amate in a za uhi.
47 Tua ciengin Peter in, “Eima banga Hlagau Siengtho a nga tam mite a ki-baptize lo nadingin koi in tui kham thei ding ahei?” a ci hi.
48 Tuaci’n ama in Jesu Khris’ min tawh a ki-baptize nadingun amate thu a pie hi. Tua ciengin ni tampi sung a tam lai nadingin amate in ama a hlo uhi.
