Jerusalem Pawlpi tunga Peter Thuzahsahna
11
1 Tu-in Gentile-te in zong Pasien’ thu sang zo ta uhi, ci thu Judea gama om sawltahpite le thu umtea in a za uhi.
3 “Bang ziehin a tep kitan lo mite kungah tungin amate tawh an neton mawh na hei? ci-in a mawsah uhi.
4 Tua ciengin Peter in a thu omzie teng a banbanin amate kungah sut a,
5 “Joppa khuo ah thu ngenin ka haituh laitahin mang ka mu hi. Keima in vantung panin a ningli ciet pana a kikhaisuh a peh golpi bang khat ka kunga ang tusuh ka mu hi;
6 tuami limtahin ka et leh keng li a nei ganhingte, sasielne gamsate, a bawhva ganhingte le vana a leng vate ka mu hi.
7 Awging khat in, “Peter aw, tho inlen, go-in ne in,” ei ci zong ka za hi.
8 Ahi vangin keima in, ‘Topa, hi thei malmal sih; azieh pen a bua ahi sihle a sieng lo nate ka kam sungah a tum ngai nai vawt sih hi,’ ka ci hi.
9 Ahi vangin tua awging ma in vantung panin a niveina ei dawng a, ‘Pasien in a sienga a bawlsate a bua hi bo ci paupau sin,’ ei ci hi.
10 Tu-a bangin thumvei ang pieng a, tua ciengin tua teng zosie a unpi-in vantungah a kikaito kia hi.
11 Tua laitahin ka opna inn ah Caesarea pana ang kisawl mi thumte thakhatin ang tung uhi.
12 Eite le amau’ kikalah khentuom ci nei loin amate tawh a zawhton dingin kei kungah Hlagau in ei gen zo hi. Tami i sanggam guhte in zong ei zui vua, tua mipa’ inn ah ka tung uhi.
13 Ama in ka kung vuah a inn sunga vantungmi khat a din a mu dan le, ‘Joppa khuo-ah mi sawl inlen Peter a kici Simon hlansah in.
14 Nangma le na innkuonpi bup un hutdamna na nga thei nading uh thu ang gen ding hi,’ a ci dan teng ei gen hi.
15 Thu gen ka kipat laitahin eite tungah Hlagau Siengtho a tuncil lai bangin amate tungah zong ang tung hi.
16 Tuale Topa in, ‘John in tui tawh na baptize a, ahi vangin note na hi ule Hlagau Siengtho tawh ang ki-baptize ding hi,’ ci-in a gen ka phawhkia hi.
17 Topa Jesu Khris i up ciengin Pasien in letsong ei pieh bangin amate tungah zong a kibanga a pieh ahileh Pasien’ nasepna a khahtan zo dingin kei koi hi lel ka hei?” a ci hi.
18 Tami thu a zah ciengun amate a dai dide uhi. “Tua ciengin Pasien in Gentile-te tung nangawn ah zong hinna nga thei nading kisiakiana thu a pie hi,” ci-in amate in Pasien a phat uhi.
Antioch Khuo-a Pawlpi
19 Stephen tungah bawlsietna a tun ziehin a kithethangte in Phoenicia gam, Cyprus tuikul, le Antioch dongin a banzin vua, amate in Jew mite kung simlo koima kungah thu a hil sih uhi.
20 Ahi vangin Antioch khuo-a pei, Cyprus tuikul le Cyrene khuo mite pawlkhat in Greek ham a zang Jew mitec kungah zong Topa Jesu’ thu a tangko uhi.
21 Topa’ khut amate tawh om a, Topa lamah thu um mi tampitah a kihei uhi.
22 Jerusalem-a om hlattuom pawlpite in tami thu thate a zah ciengun Antioch khuo ah Barnabas a sawl uhi.
23 Ama tungin Pasien’ hepina thupha a mu ciengin a lungdam a, tuale ama in tupna kip tawh Topa tungah a citah nadingun amate a hanthawn hi.
24 Bangzieh ahei cile ama pen mi hoi, Hlagau Siengtho le upna tawh a kidim mi khat ahi ziehin Topa sungah mi tampi a kibelap hi.
25 Tua ciengin Tarsus khuo ah Saul sui dingin Barnabas pei a,
27 Tua hunin Jerusalem panin Antioch ah kamsangte a peisuh uhi.
28 Amate sung panin Agabus a kici mipa khat dingto-in, leitung gam zosie-ah a siehuoi kielpi khat tung ding hi, ci-in Hlagau tungtawnin a magen hi; tuale Claudias hun lai-in tuami thu tung ngai zo hi.
29 Nuazuite in ahi zaw za ciet utawh Judea gama teng thu um mitee huna sum hlah dingin a khensat uhi.
30 Amate in tua bangin a bawl vua, Barnabas le Saul tung panin upate kungah a hlah uhi.
