James Kithat, Peter Thongkie
12
1 Khum hun sawng tengin Herod Kumpipa in hlattuom pawlpi mi kimkhat a bawlsie hi.
2 Ama in John’ sanggampa James zong namsau tawh thatsah hi.
3 Tua thu in Jew mite lungkimsah hi, ci a mu bepin ama in Peter zong mansah leuleu hi. (tua hun pen Tolsawlo Anlum Pawi hun sung ahi hi. )
4 Ama a mat zaw ciengin ama in thong sungah khum a, Peisan Pawi a ven ciengin mipi mai-a peipi dingin li ta-a om galkap pawl lite’ cin dingin ap hi.
5 Thong sungah Peter a kikhum laitahin hlattuom pawlpi mite in ama adingin Pasien kungah nahpi tahin thu a ngetpieh uhi.
Thong panin Peter Kihla
6 Herod in Peter a lahkhiet ding kuon tuami zan ma-in siakhau gui ni tawh a kikhisa-in galkap nite kikalah Peter lum a, kot mai-ah thongcingte in a cing uhi.
7 Topa’ vantungmi khat thakhatin kilang a, thong inn sung teng khuovah khat in a tanvah hi. Vantungmi in Peter a pang behpieh a, “Mallangin tho in,” ci-in a phong leh a khuta siakhaute a kiphelmang hi.
8 Vantungmi in, “Na kawnggah gah inlen na kedap bul in,” a ci bangin ama in zong a bawl hi. Tua ciengin vantungmi in, “Na puonzal vat inlen ei zui in,” a ci hi.
9 Peter zong pusuohin ama a zui hi; ama in tua vantungmi’ huna tawh a pieng thu teng a tahtah ahi lam a thei vateh sih a, mangmu-in a kingaisun lel hi.
10 A khatna le a nina thongcingte a kal zaw ciengun khuopi sung lutna siakotpi mai a tung uhi. Tua kotpi ama thu-in ama gel adingin kihong a, tuale ama gel pusuohin lampi khat a zui laitahun vantungmi in thakhatin Peter a nuasie hi.
11 Tua ciengin Peter khuophawh a, “Tu-in Topa in a vantungmi sawlin, Herod’ khut sung pan le Judah-te’ kinepna zosie sung panin ei hunkhie zo hi, ci thu ka theicien ta hi,” a ci hi.
12 Ama in tam thu a thei behin a mindang khat Mark a kici John’ nu Mary inn ah haw a, tua sungah mi tampi kikhawmin thu a na ngen uhi.
13 Ama in a pulam kot a kiu leh a dawng dingin Roda kici nasem numei khat a pei hi.
14 Tua nu in Peter’ aw ahi lam a thei bepin a kipah seng ziehin kot honpieh tah zawh sangin inn sungah tai-in Peter kotah ding hi, ci-in a va gen ta hi.
15 Amate in tua nu kungah, “A maw na mah!” a ci uhi. Hizongle tua nu in a om tahtah ma ahi hi, a ci paupau ciengin amate in, “Ama’ vantungmi hi bo va,” a ci uhi.
16 Tua sung tengin Peter in kot a kiukiu hi; tuale amate in kot a hon ciengun ama a mu vua, lamdang a sa mama uhi.
18 A zing ciengin galkapte lahah Peter bangci ta ahei, ci thu buoina lienpi a om hi.
19 Herod in ama suisahin a mu lo bepin thongcingte thu sit a, tuale tha dingin amate thu a pie hi. Tua ciengin Judea gam panin Caesarea khuo-ah Herod peisuhin tua munah a tam hi.
Herod’ Sina
20 Tu-in Tyre le Sidon mite tungah Herodb lungthah mama hi. Tuaci’n amate kithutuoh tahin ama kungah a pei uhi. Amau’ gam pen kumpipa’ gama anneh ding puasui ahi bo ziehun amate in kumpi’ inn sunga vaihawm ulien Blastus a zol zaw ciengun kilemna ding a ngen uhi.
21 Kiciem ni a tun ciengin Herod in a kumpi puontuol sil a, kumpi’ topha tungah to-in amate kungah thu a gen hi.
22 Tua ciengin mite in, “Tam pen mihing’ aw ahi sih a, pasien khat’ aw ahi hi!” ci-in a awng uhi.
23 Herod in Pasien’ min a phat lo ziehin thakhatin Pasien’ vantungmi khat in ama a ci nasah a, than in netumin a si hi.
