Barnabas le Paul Kisawl
13
1 Tu-in Antioch khuo-a hlattuom pawlpi sungah kamsangte le siete a om uhi: Tuate pen Barnabas, Niger kici Simeon, Cyrene khuo mi Lucius, gam uhpaa Herod’ thukhen zuma vaihawm pa khat ahi Manaen le Saul ahi uhi.
2 Topa bie-in an tangin a op laitahun Hlagau Siengtho in, “Amate in kei adingin ka hlatna nasep a sem dingin Barnabas le Saul ei tuomkhen pieh un,” a ci hi.
3 Amate in zong an tangin thu a nget zaw ciengun ama gel tungah a khut uh nga-in a sawlkhie uhi.
4 Tuaci’n Hlagau Siengtho sawl ahi ziehin Seleucia khuo ah a peisuh uhi; tua panin tembaw tawh Cyprus tuikul-ah a pei uhi.
5 Salamis khuo a tun ciengun Jew mite kikhopna inn sungah Pasien’ thu a hil uhi. John zong amate hu dingin a om hi.
6 Tua tuikul tung zosie-ah a zin kawikawi vua, Paphos khuo a tun dong uh a pei zaw ciengun Bar-Jesus a kici aisan siem Judah kamsang zuou khat tawh a kituoh uhi.
7 Ama pen a pil mama gam uhpa Dergius Paulus tawh a omton hi. Tua gam uhpa in Pasien’ thu a zah nop ziehin Barnabas le Saul a hlansah hi.
8 Ahi vangin tua mitphiel siempa Elymas (azieh pen tua khu ama’ min kiletkhietna ahi hi ) in amate na langpan a, tua upna panin gam uhpa heikhiet ding a hanciem hi.
9 Ahi vangin Paul a kici Saul zong Hlagau Siengtho tawh kidimin Elimas limtahin en a,
10 “Dawimangpa’ tapa, thudih zosie’ galpa, solna le tatsietna namcin tawh a kidim pa aw, a tang Topa’ lampite a kawi-a na bawl pen tawp nai lo ding na mah?
11 Ngai in, tu-in Topa’ khut in nang ang langpang a, na mit taw-in bakhat sung khuo na mu thei sih ding hi,” a ci hi. Thakhatin meii le khuomiel in a tuom ziehin tua pa in a khuta a kai ding mi a sui kawikawi hi.
12 A piengsa thute a mu ciengin gam uhpa in a um pai hi, bangzieh ahei cile ama in Topa’ thuhilnate lamdang a sa hi.
Pisidia Gam Antioch ah Paul le Barnabas
13 Paphos panin Paul le a lawmte tembaw tung tuongin Pamphylia gam Perga khuo a tung uhi. Ahi vangin tua khuo panin John in amate nuasie-in Jerusalem ah a kilekia hi;
14 ahi vangin Perga panin amate peisuohin Pisidia gam Antioch a tung uhi. Tuale sabbath ni-in kikhopna inn sungah amate lutin a to uhi.
15 Amate in thukham laibu le kamsangte’ laibute a sim zaw ciengun biehinn uhpa in amate kungah mi sawlin, “Sanggamte aw, mite adingin hanthotna thu na gen nop uleh gen un,” a cisah hi.
16 Tuaci’n Paul dingto a, a khut vihin thugen kipan a, “No Israel-te le Pasien giing midangte aw, ngai un.
17 Tami Israel-te’ Pasien in i pu i pate na teel a, Egypt leitanga a op lai-un minam lien khatin na bawl a, tua gam panin a kilamto ama’ banhat tawh amate na peipi hi.
19 Canaan gam sunga om minam sagite a suhsiet zaw ciengin a luo dingun a gam uh amate a pie a,
20 kum zali sung bang a luosah hi. Tua zaw ciengin ama in kamsang Samuel khang dongin amate tungah thukhente a pie hi.
21 Tua ciengin amate in kumpi khat a ngen vua, Pasien in kum sawmli sung amau’ kumpi dingin Benjamin minam sung panin Kish’ tapa Saul a pie hi.
22 Saul a hepkhiet zaw ciengin ama in a kumpi dingun David ahisah hi. Ama’ thu a teci panna sungah ama in, ‘Ka deina zosie a sem dingin ka lungsim a su Jesse’ tapa David ka mu zo hi,’ a ci hi.
23 Pasien in a kamciemsa bangin tam mipa’ suonlehlahte sung panin Israel mite tungah Gumpa Jesu a piengsah hi.
24 Ama’ pei masangin John in Israel mi zosie tungah mawna pana kisiakiana tawh kisai baptize na thu na hil zo hi.
26 “Abraham innkuon’ suonlehlah ka sanggamte le noted lahah Pasien a giing midangte aw, note kungah tami hutdamna thu ang kipuoh zo ta hi.
27 Jerusalem-a tengte le a makaite un ama hile sabbath ni siela kisim kamsangte’ thugente hile a thei lo ziehun, amate in ama tunga mawmatna tawh tua thute a na tangtungsah uhi.
28 Amate in sina thukhenna ding za-in ama tungah thu mu sih nan ule Pilat kungah a kitha thei nading a na ngen paupau uhi.
29 Ama’ thu a kigiel zosie a tangtunsah zaw ciengun singkhuom tung panin ama lakhie-in hankhuh sungah a siel uhi.
30 Ahi vangin Pasien in misite lah panin ama thosah zo hi;
31 tuale Galilee gam panin Jerusalem dong ama a zawpi mite kungah ni tampi sung kilah a, amate tu-in mite mai-ah teci ahi uhi.
32 Ko ka hi ule Pasien in i pu i pate tunga a na ciemsa lungdamna thu ang puoh ka hi vua,
33 ei a tate adingin ama in Jesu a thawsahkiana tawh a tangtun zo hi. Late dawng nina sungah zong,
‘Nang ka Tapa na hi hi;
tuni-in nang kang piengsah zo hi,’ ci-in kigiel hi.
34 Muotna a zuonkia nawn lo dingin misite lah panin ama a thawsahkiana tawh kisai-in ama in,
‘David tunga ka ciemsa
a siengtho kamciemte
nangma kang pie ding hi,’
ci-in tam bangin a gen hi.
35 Tua ahi ziehin Late mundang khatah zong, ‘Na Misiengtho Pa muotna na thuohsah sih ding hi,’ a ci hi.
36 Bangzieh ahei cile David in a khan sungin Pasien’ deina banga na a sep zaw ciengin si a,e a pu a pate gei-ah kivui-in muotna a thuoh hi;
37 ahi vangin Pasien in a thawsah pa ahile muotna thuoh lo hi.
38 Tua ahi ziehin ka sanggamte aw, tam mipa ziehin note tungah mawmaisahna thu ang kitangko ahina thu kithei taheh;
39 tami Jesuf ziehin Moses’ thukham zieha na suotah thei lona uh mawna zosie panin na suohta zo ta uhi.
40 Tua ahi ziehin note tungah kamsangte’ thugen ang tun lo nadingin kidawm un:
41 ‘No mi zakote aw, en un!
Lamdang sa unlen, mangthai ta un,
azieh pen mi khat in na kung vua ang gen leh
na up ngai vawt lo ding uh nasep khat
na hin sungun ka bawl ding hi,’
ci-in a hil hi,” a ci hi.
42 Paul le Barnabasg a pusuo laitahun mite in sabbath ni kia ciengin tam thute ei gen in,” ci-in a zawl uhi.
43 Kikhopna a man zaw ciengin Judah mi tampite le Judah biehna pana a kikhelsa a kipumpieh mite in Paul le Barnabas a zui vua, ama gel in zong Pasien’ hepina sungah tua mite a op den nadingun thu hilin a hanthawn uhi.
45 Hinanle Jew mite in mihonpi a mu ciengun a thangsie mama vua, tuale amate in Paul’ thugen langpangin a gensie uhi.
46 Tua ciengin Paul le Barnabas in hangtahin thu a gen tuoh vua, “Kote in na kung vuah Pasien’ thu kang gen masah ding uh a kisam hi. Note in tua thu nielin hin tawntungna nga dinga kilawm na kisah lo ziehun tu-in Gentile-te kungah ka kihei ta uhi.
47 Bangzieh ahei cile Topa in eite thu ei pie a,
‘Leimong dongah hutdamna thu
na puoh thei nadingun,
Gentile-te tungah khuovah ahi dingin
note kang koi zo ta hi’ ei ci hi,” a ci uhi.
48 Gentile-te in tam thu a zah ciengun lungdamin Topa’ thu a patawi uhi. Kumtawn hinna a nga dinga a kisesa zaza in thu a um uhi.
49 Tua bangin gam buppi-ah Topa’ thu a kizel hi.
50 Ahi vangin Jew mite in Pasien’ thu a hakat, a zatahhuoi numeite le khuopi sunga om makaite a hantawh vua, tuaci’n Paul le Barnabas bawlsiesahin a gam panun a notmang uhi.
51 Tuaci’n amate in a keng vua leivuite thingin Iconium khuo ah a pei uhi.
52 Nuazuite ahi ule Hlagau Siengtho tawh kidimin a kipah mama uhi.
