Timothy in Paul le Silas Zui
16
1 Paula peisuoh lai-in Derbe le Lystra khuo ah a tung a, tua munah thu um Jew mi numei khat’ tapa Timothy a kici nuazui khat a om hi; ahi vangin a pa pen Greek mi ahi hi.
3 Paul in Timothy a kithuopi nuom hi; tua mun tenga a teng Jew mite ziehin tua pa zawpi-in a tep a tanpieh hi, azieh pen amate in a pa Greek mi ahi lam a unpi-un a thei uhi.
4 Khuopi khat pan khuopi khat zin kawikawi-in Jerusalem-a sawltahpite le upate in zui dinga khensatna a bawlsate uh amate tungah a pie uhi.
5 Tuaci’n upna sungah hlattuom pawlpite thahatsahin nisimin thu um mimal a khang hi.
Paul’ Mang Sunga Macedonia Mipa
6 Hlagau Siengtho in Asia gam sungah Pasien thu a hil ding uh phal lo ahi ziehin Phrygia le Galatia gam tengah a zin uhi.
7 Mysia gamgi a tun uh ciengin Bithynia gam a lut sawm vangun Jesu’ Hlagau in amate a phal sih hi;
8 tuaci’n Mysia gam nawt suohin Troas khuo ah a peisuh uhi.
9 Zanlai-in Paul in mang khat a mu hi; tua munah Macedonia mi khat dingin, “Macedonia gamah hing galkai inlen kote ei hu in,” ci-in a thum hi.
10 Ama in mang a mu zaw ciengin amate kungah lungdamna thu a tangko dingin Pasien in eite ei hlan zo hi, ci-in ngaisun ka hi ziehun Macedonia galkai ding thakhatin ka sawm pai uhi.
Lydia a Kikhelna
11 Troas khuo panin gunkuong tung tuongin Samothrace tuikul lam zuonin tangtahin ka pei vua, a zing ni-in Neapolis khuo tungin,
12 tua mun panin Macedonia gamkhenc sunga khuo thupi pen le Rome mite tenna Philipi khuo ah ka tung uhi. Tami khuo ah ni tampi sung ka tam uhi.
13 Sabbath ni-in khuopi tunkot pulamah ka pusuoh vua, thungetna mun hi kha ding hi, ci-a ka upmawna uh gun gei lamah ka pei uhi; tuale ka to vua, khum sunga a kikhawm numeite tawh ka kiholim uhi.
14 Pasien a bie Lydia a kici numei khat in ka thugen uh a ngai hi; tua nu pen Thyatira pana puon dupsan zua ahi hi. Ama in Paul’ thugente lawp tahin a ngai thei nadingin Topa in a lungsim a honpieh hi.
15 A innkuonpite tawh a ki-baptize ciengin ama in kei kungah, “Note in kei, Topa adingin mi muonhuoi khat a nei ngaisut uleh hing pei unlen ka inn ah hing tung ta un,” ci-in ei zawl hi.
Paul le Silas Thong Sungah
16 Nikhat, thungetna mun zuona ka pei laitahun, dawi lawm nei, mailam thugenna tawh a pute sum tampi a suipieh sila numei khat tawh ka kituoh kha uhi.
17 Tua nu in Paul le ko ei zui laitahin, “Tam mite pen na kung vua hutdamna lampi ang tangko Sangpen Pasien’ silate ahi uhi,” ci-in ang kiko hi.
18 Tua bangin ni tampi sung a awng den mielmuol hi. Ahi vangin Paul in tuapa seda mama a, tuale ama kihei-in tua hlagau kungah, “Tam nu sung panin na pusuo nadingin Jesu Khris’ minin thu kang pie hi,” a ci hi. Tua hun lien ma-in tua hlagau a pusuoh pai hi.
19 Ahi vangin a pute in a sum mu nading uh lametna tawp zo hi, ci-in a thei bepun amate in Paul le Silas-te a man vua, tuale vanzuana mun thuneite mai-ah a kaiphit uhi.
20 Thukhenmangte kung a tut uh ciengin amate in, “Tam mite in i khuo sung a buoisah uhi; ama gel pen Jew mite ahi vua,
21 tuale kote Rome mi ka hina utawh ko adingin pom ding le zui dinga kilawm lo ngainate ei hil uhi,” a ci uhi.
22 Mihonpite in ama gel a vuohpi valuoi vua, tuale thukhenmangte in zong a puon uh hawhmang piehin ciengpum tawh a sat nadingun thu a pie uhi.
23 Amate in nahpitahin a sat zaw ciengun thong sungah a khum vua, hoitaha a cin nadingin thongcing pa a vaihlah uhi.
24 Thongcing pa in zong tam kivaihlahnate ma bangin thonginn sungtawng penah ama gel koi-in kengkol a bul hi.
25 Zankim pawlin Paul le Silas in thu ngenin Pasien tungah phatna late a sa vua, tuale thongkiete in a ngai uhi.
26 Thakhatin zil ling a, tua zil a natsiet seng ziehin thonginn a zung dongin a lawhthing gawp hi. Thakhatin kotkhah zosie kihong a, mi zosiete’ kikhina siakhaute a kiphel sieng hi.
27 Thongcing pa zong khanglo-in thong kotpi zosie kihong sa-a om a mu bepin, thongkie zosie a pit sieng hi ta va, ci-in ngaisun a, tua ziehin a namsau dawhin ama le ama a kithat dingin a kisa hi.
28 Ahi vangin Paul in, “Nang le nang bangma kilaw sin, azieh pen tanah ka unpi-un ka om uhi,” ci-in a aw neiza tawh a kiko hi.
29 Thongcing pad in meivah ngenin thong sung a nawlut pai a, Paul le Silas-te mai-ah a citunsa-in a khupbawh hi.
30 Tua ciengin ama gel a pusuopi a, tuale ama in, “Siete aw, hutdamna ka nga nadingin bang bawl ding ka hei?” a ci hi.
31 Ama gel in, “Topa Jesu um in, tua hile nang le na innkuonpite in hutdamna na nga ding uhi,” ci-in a dawng uhi.
33 Khum zan tua hun lien ma-in tua pa in ama gel peipi-in a maliemte uh a sawp siengpieh hi; tua ciengin ama le a innkuonpite zosie a ki-baptize pai uhi.
34 A inn ah ama gel peipi-in a mai vuah ankuong zong a lui hi; tuale ama pen Pasien sunga thu um mi khat hi ta ahi ziehin ama le a innkuon buppi a lungdam uhi.
35 Zingmawng ciengin thukhenmangte in palih khat sawlin, “Tua mite hlakhie ta un,” a ci hi.
36 Thongcing pa in Paul kungah thu puoh a, “Thukhenmangte in no gel hla nadingin kam ei kivaihlah zo hi; tua ziehin tu-in pusuoh unlen lungnuom tahin pei ta un,” a ci hi.
37 Ahi vangin Paul in, “Amate in Rome gammi ahi kote, mawsahna thu om lopi-in mizapi mai-ah ei satin thong ei khie uhi; tu-in zong koima’ thei lo-in ei dap hla sawm uh amah? Hi thei lo ding hi! Amate mama hing pei-in ei hla uheh,” ci-in a dawngkia hi.
38 Palihte in thukhenmangte kungah tam thute a ko vua, amate Rome gammi ahi uh a zah bepun a zau mama uhi.
39 Tuaci’n ama gel kungah amate pei-in a va thum ta vua, thong panin ama gel la dawhin khuopi a nuasie nadingun a zawl uhi.
