Thessalonica Khuo-a Buoina
17
1 Paul le Silas-tea in Amphipolis le Apollonia khuote nawhin Judah-te’ kikhopna inn opna Thessalonica khuo a tung uhi.
2 A pei ngaina ma bangin kikhopna inn sungah Paul tumin, Lai Siengtho pansie-in sabbath ni thum sung amate tawh thu kikum a,
3 Messiahb in gimna thuohin misite lah panin a thawkia ding a kisapna thute hilcienin lahtel a, “Note kunga kang tangko Jesu khu Messiahc ahi hi,” a ci hi.
4 Amate pawlkhat lunglutin Paul le Silas a pawl vua, tua ma bangin Pasien a giing Greek mi tampite le numei makai tampi in zong a pawl uhi.
5 Ahi vangin Jew mite haza-in vanzuana muna om migilote pawlkhat a ciel vua, tuaci’n amate in mihonpi khawmin khuopi sung a buoisah uhi. Mihonpi mai-a kaikhiet dingin Paul le Silas a sui laitahun amate in Jason’ inn a bulu uhi.
6 Ama gel a mul zo lo bepun amate in Jason le thu umted pawlkhat kaiphitin khuopi thuneite’ mai-ah a tut vua, “Leitung kikhulehsah tam mite tami munah zong ang tung ta vua,
7 Jason in a inn ah amate zin a tungsah hi. Amate in a unpi-un kumpipa’ thupiehte tawh a kikelbulin a gamta vua, Jesu a kici kumpi dang khat om hi, a ci uhi,” ci-in a kiko uhi.
8 Mipite le khuosung uliente in tami thu a zah ciengun a buoi mama vua,
9 tuale amate in Jason le adangte tat nading sum a lah zaw ciengun a hlakhie uhi.
Beroea Khuo ah Paul le Silas
10 Tua zan ma-in thu um mitee in Beroea khuo ah Paul le Silas a peisah uhi; ama gel a tun ciengun Jew-te’ kikhopna inn sungah a lut uhi.
11 Thessalonica-te sangin tami Juda mite in Pasien’ thu a sang theizaw uhi, azieh pen amate in Pasien’ thu kigente lunglut tahin pomin tua a kigen thute ahi ma amah, ci-in nisielin Lai Siengtho tawh a sittel uhi.
12 Tua ahi ziehin amate tampi in Pasien’ thu a um vua, tua mite lahah Greek numei tawmno khat le dinmun sangpi a nei Greek pasalte zong a kihal uhi.
13 Hinanle Beroea khuo-ah zong Paul in Pasien’ thu tangko zo hi, ci Thessalonica khuo-a Jew mite in a thei ciengun amate zong tuanah pei-in mipite holtuo-in a satsuo uhi.
14 Tua ciengin thu um mitef in tuipi lamah thakhatin Paul a hladap vua, ahi vangin Silas le Timothy-te a tam lai uhi.
15 Paul a zawpi mite in Athen cieng dong a hla uhi; tuale Silas le Timothy-te in a gang theithei-in Paul ang pawlkia nading uh thu vaihlahna a nga zaw uh ciengin a kilekia uhi.
Athen Khuo ah Paul
16 Ama gel ngahin Athen khuo ah Paul a op laitahin milim tawh a kidim tua khuo mu-in a lungsim a na mama hi.
17 Tuaci’n ama in kikhopna inn sungah Jew mite le Pasien a zatah mite thu kuppi a, vanzuanag munah a kituopi khah mite tawh zong nisielin thu a kikum uhi.
18 Thuthuh pilna nei Epicurea le Stoic-te pawlkhat ama tawh thu a kiniel uhi. Pawlkhat in, “Tami a kipilsah thu mawh gengen pa khu bang gen nuom ahiei?” a ci uhi. A dangte in, gamdang pasien-te’ thu gen hile kilawm ve aw,” a ci uhi. (Ama in Jesu’ Lungdamna thu le thawkiana thu a gen zieh ahi hi.)
19 Tuaci’n amate in Paul hlanin Areopagus mun a tut vua, “Kote in na gengen tami thuhilna tha ka theithei ding vuoi mah?
20 Kote adingin thu tuomdang pi khat ahi a, bang a ci nopna ahei ka thei nuom uhi,” a ci uhi.
21 Tu-in Athen khuomi zosie le tua khuo-a a teng gamdang mi zosie in thu tha pawlkhat genna ding ahi sihle tua thute ngaina ding ci simlo, a hunte uh bangma dangin a zang sih uhi.
22 Tua ciengin Areopagus mai-ah Paul ding a, “Athen mite aw, biehna thu a pawnthaw mama mite na hina uh pen na gamtatna zosie vuah kang thei hi.
23 Bangzieh ahei cile khuo sung muncin tengah vah kawikawi-in na bieh uh nate ka cienvel ciengin maitam tung khatah, ‘A kithei kha lo pasien ading,’ ci-a kigiel lai khat ka mu hi. Tua ahi ziehin na kung vuah thei khah lopi-a na bieh pa uh ang tangko ka hi hi.
24 Leitung le a sunga a om na vannuoi a siem Pasien pen lei le van a uh Topa ahi a, ama pen mihingte’ khut tawh a kibawl biehbuhte sungah teng lo hi.
25 Ama ma in mi zosie tungah hinna, nahuu le na vannuoi a pieh ziehin ama pen tasap khatpo a nei bang danin mihingte’ khut in ama’ na a seppieh ding kisam lo hi.
26 Ama in pupih khat tung panin leitung buppi a luo dingin minam zosie bawl a, amau’ hin tanvei ding le amau’ tenna ding gamgite sesa-in a koipieh hi.
27 Tua khu amate in Pasieni sui-in a mu thei khah uleh ci deina ahi a, ahi vangin ama ahile i kung ciet panin a gamla op sih hi.
28 Bangzieh ahei cile, ‘Ama sungah eite nungta-in i pia valiai vua, mihing hina i nei uhi,’ kici a, na laphuote uh pawlkhat nangawn in, ‘Azieh pen eite zong ama’ hlah le suonte i hi uhi,’ na na ci uhi.
29 Eite i hi ule Pasien’ tate i hi ziehun i Pasien pen mihingte’ khutsiemna le ngaisutna in a bawl le a zep ngun le kham, suongtumte le milimte tawh a kibanga i ngaisut ding uh a kilawm sih hi.
30 Mihingte’ thei lo hun lai-in Pasien in phamaw a na sa sih a, tu-in ahile ama in mun zosie-a om mi zosie a kisiakia nadingun thu a pie hi.
31 Bangzieh ahei cile ama in a sesa mipa tungtawnin dihna tawh thu a khen nading ni khat a sekhol zo hi. Misite lah panin ama a thawsahkiana tawh tami thu a man a hina mi zosie tungah hla muonna a pie zo hi,” ci-in a gen hi.
32 Amate in a sisa mite thawkiana thu a zah ciengun pawlkhat in a simmawbawl uhi; ahi vangin adangte in, “Tami thu khatvei za nuom lai ung,” a ci uhi.
33 Tua laitahin Paul in amate a nuasie hi.
34 Ahi vangin amate kimkhat in ama panpi-in thu um mi a suoh vua, tuate lahah Areopagus’ pawlmi Dionysius, le Damaris a kici numei khat le adangte kihal hi.
