Ephesus Khuo ah Paul
19
1 Corinth khuo ah Apollos a op laitahin gam sung muncin tengah Paul zin kawikawi-in Ephesus khuo tung a, tua tahah nuazui pawlkhat tawh a kimu hi.
2 Ama in amate kungah, “Thu um mi na suo zaw ciengun Hlagau Siengtho na nga vuoi mah?” a ci hi. Amate in, “Ka nga sih uhi, Hlagau Siengtho a op lam nangawn zong ka za ngai sih uhi,” ci-in a dawng uhi.
3 Tua ciengin ama in, “Tua ahile bang baptize-na na nga vuoi?” a ci hi. Amate in, “John’ baptize-na ka nga uhi,” ci-in a dawng uhi.
4 Paul in, “John in kisiakiana tawh baptize-na pie a, ama’ nua-a pei ding pa Jesu a up nadingun mipite kungah a gen hi,” a ci hi.
5 Amate in tam thu a zah ciengun Topa Jesu’ min tawh a ki-baptize uhi.
6 Amate tungah Paul in a khut a ngah zaw ciengin Hlagau Siengtho tung a, kam tuomtuom tawh hamin thu a gen uhi.
7 Amate a kigawmin mi sawm le ni a pha uhi.
8 Kikhopna inn sungah ama lutin hla thum sung Pasien’ manggam thu kikuppi a, mi lungsim zo theithei dingin thu a gen hi.
9 Mi pawlkhat a lung uh khau a, amate in um nuom loin mipite mai-ah tua Lampi thu a gensiet ciengun amate kung panin nuazuite tawh Paul kihem dawhin Tyrannusa thuhilna innpi sungah nisielin thu a kikuppi hi.
10 Asia gam sunga a teng Jew mite le Greek-te in a unpi-un Topa’ thu a zah thei nadingun tam bangin kum ni sung a zomsuoh hi.
Sceva’ Tapate
11 Pasien in Paul tungtawnin na lamdang thupite bawl a,
12 tuaci’n ama’ citung tawh a kithusa mainulte hile puonte hile cinate kungah a kipeipi ciengin, a natnate uh damin amate kung panin hla gilote a taimang hi.
13 Tua ciengin dawi hawlkhie-a a vah kawikawi Jew mite pawlkhat in Topa Jesu’ min zah sawmin dawilut mite kungah, “Paul in a genpa Jesu’ min tawh thu kang pie hi,” a ci uhi.
14 Sceva a kici Judah siempu lien pa’ tapa sagite in tua bangin a bawl uhi.
15 Ahi vangin hla gilo in amate kungah, “Jesu ka thei a, Paul zong ka thei hi; no koi na hi uh ahei?” a ci hi.
16 Tua ciengin amate tungah dawivei pa kitomin amate a unpi-un a zo gawp a, a zawthaw bawl seng ziehin puon sil loin amate a liemsa-in inn panin a taimang uhi.
17 Ephesus khuo-a teng Jew mite le Ephesus mite zosie in tam thu a thei ciengun zau-in Topa Jesu’ min a phat uhi.
18 Thu-umsa tampite in zong a gamtatnate uh pulahin a thum uhi.
19 Aisan thei mi tampite in a laibute uh a khawm vua, amate in mipi’ muna-ah a haltum uhi; tua laibute a man a kituot ciengin ngun peh tul sawm nga man hi, ci kithei hi.
20 Tuaci’n Topa’ thu thahat tahin khangin a guolzo hi.
Ephesus Khuo-a Buoina
21 Tu-in tam thu zosie a pien zaw ciengin Paul in Macedonia le Achai-a gamte nawhin Jerusalem khuo ah peisuoh ding a khensat hi. Ama in, “Khumtah ka tun zaw ciengin Rome zong ka mu kul ding hi,” a ci hi.
22 Ama in Macedonia gamah ama a hu mi ni ahi Timothy le Erastus-te sawl a, Asia gam sungah bakhat sung a tam lai hi.
23 Khum hun pawlin Lampi thu tawh kisai buoina lienpi a tung hi.
24 Demetrius a kici ngunkheng pa khat in ngun tawh Artemis biehna inn neute bawl a, khutsiemte adingin sumsuina lien mama khat a suohsah hi.
25 Ama in tua mite le a nasep uh a kibang nasemte kaikhawm a, “Guoite aw, tami nasepna panin hauna i nga lam na thei uhi.
26 Tami Paul in Ephesus khuo guoh hi loin Asia gam mun zosie phielah khut tawh a kibawl pasien-te pen pasien ahi sih hi,” ci-in gen a, ama in mihon tampitah zawlin a kaimang sieng hi, ci thu zong mu-in na za uhi.
27 Tua hi a, tami i sumsui nasepna guoh ang minsie khop sih ding a, a lien mama nusien Artemis’ biehinnpi ang kisimmaw bawlin, tuale Asia gam zosie le leitunga kibie numei nu’ thupina teng zong ang maiman khah ding a zauhuoi mama hi,” a ci hi.
28 Amate in tam thu a zah uh ciengin a lungthah nah mama vua, “Ephesus mite’ Artemis lien mama hi!” ci-in a kiko uhi.
29 Tuaci’n khuosung teng buoina tawh kidim a, mipite in mihon kikhopna innpi sungah Paul’ khuolzinpi Macedonia mi Gaius le Aristarhus a kaiphit uhi.
30 Mihonte lahah Paul pei nuom a, ahi vangin nuazuite in a lut sah sih uhi.
31 Paul’ lawmte ahi Asia gam ulien pawlkhat nangawn in zong mihon kikhopna innpi sunga a lut lo nading uh mi sawlin a thum uhi.
32 Tua hun sungin a kikhawm mite a buoi ziehun mi pawlkhat in thudang gen a, adangte in thudang khat ma genin a kiho vua, a tamzawte in bang zieha kikhawm uh ahei, ci thu a thei sih uhi. Jew mite in a mai lama a tawsawn uh Alexander pen mipite mai-ah ang tut ziehun mihon pawlkhat in a mawsah uhi. Tuale Alexander in mipite tungah a kidal nading thu gen nuom a, mipi a dai nadingin a khut a lamto hi.
34 Ahi vangin amate in Alexander pen Judah mi khat ahi lam a thei uh ciengin, amate zosie in Ephesus mite’ Artemis lien mama hi,” ci-in kithutuoh tahin nai ni phiel bang a kiko uhi.
35 Hinanle khuopi lai-atpa in mihonpi a daisah zaw ciengin ama in, “Ephesus mite aw, Ephesus mite pen a lien mama nusien Artemis’ biehinn le vantung pansa ang kiesuh biehna suongcingte ahi lam uh a thei lo koi om na hi uh ahei?
36 Tami thute pen niel thei lo thu ahi kalsie daitahin om a, ngaisutna mel a nei lo gamtatnate na bawl lo ding uh kilawm hi.
37 Note in biehinnpi bulute le i nusien-te zong a gensie lo tam mite tanah nang tut uhi.
38 Tua ahi ziehin Demetrius le a seppi khutsiemte in mi khatpo tawh thu a nei nop uleh thukhenna zumte kihong den a, thukhenmangte zong a om hi. Tuate mai-ah khatlekhat thu kinei uheh.
39 Note in thu khatpopo na kan nop lai uleh ngaina bangin mipi kikhopna-ah kikhen ding hi.
40 Bang ding ahei cile tam buoina thu tungah eite in bangma pansia ding thu pie thei lo i hi ziehin, tuni-a pieng buoina tawh thu ei kisit khah ding zauhuoi hi,” a ci hi.
41 Ama in tami thu a gen zaw ciengin kikhopna a khawlsah hi.
