Macedonia le Greek gamah Paul Haw
20
1 Tua buoina a ven zaw ciengin Paul in nuazuite hlanin a hanthot zaw ciengin mangpha pai-in Macedonia gamah a pei hi.
2 Tua gam tengah ama zin kawikawi a, thu um mite hanthotna tampi a pieh zaw ciengin Greek gamah tung a,
3 tua munah hla thum sung a tam hi. Tembaw tawh Syria gam pei ding a kisah laitahin Jew mite in ama a tha sawm ziehun Macedonia gam tawnin kilekia ding a khensat hi.
4 Beroea khuomite Pyrrhus’ tapa Sopater, Thessalonica khuomi Aristarchus le Secundus, Derbe khuo mite Gaius le Timothy, Asia gam pan Tychicus le Trophimus-te in ama a zui uhi.
5 Amate na mapei-in Troas khuo ah ei na ngah uhi;
6 ahi vangin Tolsawlo Anlum Pawi a ven zaw ciengin tembaw tawh Philippi panin ka peikhie vua, ni nga sungin Troas khuo ah amate ka pha vua, tua munah ni sagi sung ka tam uhi.
Troas-ah Mangphapai-in Paul a Zinna
7 Nipi kalkhat sung a ni masa pen ni-in, khomun balnen dingin ka kikhop uh ciengin Paul in amate tawh kikupna khat a bawl hi; a zing ciengin ama a pei sawm ziehin zankim dongin a thugen a zomsuoh hi.
8 Ka kikhopna uh innkhan tungnung ah meivah tampi kivah hi.
9 Paul in thu a sawtgen kikal sungin tawlet tunga a tuong Eutychus kici tangval pa khat a kimut suohin a lusu hi. A kimut nahsuo seng ahi ziehin dawl thumna panin kiesuhin a sisa-in a luong kiphong hi.
10 Hinanle Paul kumsuh pai a, ama tungah bawhsuhin a kawipom a, “Patau sih un, azieh pen ama sungah a hinna om lai hi,” ci-in kiko hi.
11 Tua ciengin innkhan tungnung ah Paul kato a, ama in khomun balnenin ne a, amate tawh khuovah dongin a holim zaw ciengin a pei hi.
12 Tua sung tengin amate in tangval pa a hingin a zawpi vua, a kipah mama uhi.
Troas Pan Miletus ah Tembaw tawh Peina
13 Kote in Paul ka lah sawm ziehun Assos khuo ah tembaw tawh ka na mapei uhi; azieh pen Paul in leilam tawh pei ding a gelsa mal ahi hi.
14 Assos khuo ah ei mu ciengin kohawn zong ama tembaw tungah tuongsahin Mitylene khuo ah ka pei uhi.
15 Tua panin tembaw tawh ka dingkhie vua, aa zing ciengin Chios tuikul tawh a kigalsaina mun ka tung uhi. A zing ni-in Samos tuikul ka tung vua, a thai ni-in Miletus khuo ka tung uhi.
16 Azieh pen Paul in Asia gam sungah a hun zang loin Ephesus khuo nawtsuoh dinga a khensatsa ahi hi; ahi theile Pentcost pawi ni-in Jerusalem-ah a om nuom mama hi.
Paul in Ephesus Upate Hopi
17 Ama in Melitus khuo panin Ephesus khuo ah mi sawl a, pawlpi upate in ama a kimupi nadingun a thuta hi.
18 Ama kung a tun ciengun amate kungah, “Asia gam kang tun masah ni-a kipanin note lahah ka op sunga ka hindan zosie na thei sieng ta vua,
19 Jew mite in ei na tha sawmna zieh vua ang tung gimnate keima in ka na thuoh a, kiniemkhiehna le hlitui naptui tawh Topa’ na ka na sem hi.
20 Keima in na phattuom nading uh thute khat zong hen nei loin mipi mai-ah ahi a, inn khat zaw inn khatah ahi zongin hing genin kang hil zo ta hi.
21 Keima in Jew mite le Greek-te tungah Pasien lama kisiakiana thu le Topa Jesu lama upna thute teci ka pan zo lam noma ma in na thei uhi.
22 Tu-in Hlagau’ silab ka hi ma bangin, kei tungah bang hing pieng ding ci thei lopi-in Jerusalem khuo-a pei ding ka hi hi.
23 Tuale khuopi zosie-ah thongkiehna le bawlsietnate in ei ngah gige a hina thu Hlagau Siengtho in kei tungah teci a pang hi.
24 Ahi vangin Pasien’ hepina ziehin Topa Jesu kung pana ka nga lungdamna thu ka teci pan nading ahi ka lampi le ka nasepnate ka zaw thei nading ahi nah po leh kei adingin ka hinna man nei-in ka ngaisun sih hi.
25 “Tu-in ahile note lahah hing vah kawikawi-in Pasien’ gam thu kang hil ahi note koima khat beh in ka mai nei mu ngai nawn sih ding uhi, ci ka thei hi.
26 Tua ahi tah ziehin tuni-in note khatpo’ sisan ziehin maw ka puo sih hi, ci thu kang gen hi.
27 Azieh pen Pasien’ gelna buppi ip nei loin note tungah teci ka pang zo hi.
28 Pasien in a Tapa’ sisan tawh a leisa ama’c hlattuom pawlpi a vah dingin, Hla Siengtho in note’ khut sunga ang koi na tuuhon zosie ule noma ma limtahin na kem un.
29 Ka pei zaw ciengin note lahah ngie gilote hing lutin tuuhonte ang dawm vawt sih ding uhi, ci ka thei hi.
30 Noma’ pawl sung pan nangawnin zong mi kimkhat in amate lamah nuazuite a zawl nadingun thuman a lehei mi ang pieng ding hi.
31 Tua ahi ziehin kigalging unlen, kum thum sung a sun a zanin khawl loin hlitui luong kawmin mi zosie tunga kang thuhilte na phawh bo un.
32 Tu-in Pasien in note hing lamkipin a siensuosa mi zosie lahah gouluo ang pie ama’ hepina thu sungah note kang ap hi.
33 Koima’ neisa, ngun ahi a, kham ahi a, puonsil nihten ahi zongin ka deigaw sih hi.
34 Ka khut tawh na ka sem a, keima le ka guolte’ kisapnate ka sihna thu noma ma in na thei uhi.
35 ‘Ngana sangin piehna-ah thupha tamzaw hi,’ ci Topa Jesu’ thugente phawhin tam bang nasep hakatna tawh a thanemte i hu ding uhi, ci-in na kung vuah gamtat zie ding kang lah zo hi,” a ci hi.
