Caesarea Khuo Felix Mai-ah Paul
24
1 Tua zaw ni nga ciengin upa pawl khat le Tertullus a kici sitni khat tawh siempu lien pa Ananias a peisuh vua, amate in uhpi pa mai-ah Paul a mawsahna uh thute a sung uhi.
2 Paul a kihlat zaw ciengin Tertullas in ama mawsahna thugen a kipan hi:
“A Lien Mangpipaa aw, nangma ziehin lungmuong tahin sawtpitah ka om vua, nangma’ vaihawm siemna tawh tami minamte adingin puophatnate zong kibawl zo hi.
3 Kote in mun zosie le vai zosie-ah tam na vaihawmnate lungdamna lienpi tawh ka sang uhi.
4 Ahi vangin kote in sawtveipi kang buoisah nuom lo ziehun tomkima kang gen ding thute hepina tawh nei ngaipieh nadingin kang thum hi.
5 Kote in tam mipa pen buoina a piengsah pa ahi a, leitung bup Jew mite lahah mi holtuo pa khat le Nazareth pawlte’ makai pa khat ahi lam ka thei zo ta uhi.
6 Ama in biehinnpi nangawn buasah a sawm ziehin kote in ama ka man uhi.
7 b Kote in ka thukham utawh kituohin ama tungah thu ka khen sawm uhi. Hizongle galkapmangpa Lysias hing pei-in ko kung panin pauhat thu tawh ama ei lahpieh hi.
8 Nang mama in thu hing sit lacin ama tunga ka mawmatna zosie uh a man ahi lam na thei ding hi,” a ci hi.
9 Jew mite in zong ama panpi-in tami a thugente zosie a man ma ahi hi, a ci uhi.
Felix Mai-ah Paul a Kisutna
10 Uhpi pa in thu gen dingin Paul lamah khut a van ciengin ama in, “Nangma in tam minam tungah kum tampi sung thukhenpa na hi lam ka thei ziehin lungdam tahin ka kisutna ding thu ang gen ka hi hi.
11 Na mu thei ding ma bangin Jerusalem ah Pasien bie dinga ka peito zaw ni sawm le ni ni zong a val nai sih hi.
12 Amate in biehinnpi sungah mi khatpo tawh ka kiselna hile, kikhopna inn sung ah hile, khuopi sung muncin tengah hile mihonpi ka holtuona bangma a mu sih uhi.
13 Tu-a amate in ang sun uh ei mawmatna thu uzong a manna thu ang lah thei tuon sih uhi.
14 Hizongle keima in pawltuom a ci uh tami Lampi zui-in ka pu ka pate’ Pasien ka bie a, thukham laibu sung le kamsangte’ laibu sunga a kigielsa thu zosie ka um hi, ci thu na kungah kang pulah hi.
15 Amate mama in zong midihte le midih lote’c thawkiana om tuoh ding hi, ci-in a san bangun keima in Pasien sungah lametna ka nei hi.
16 Tua ahi ziehin keima in Pasien tung le mi zosie tungah kisuonna ka nei lo nadingin ka hi thei za tawh ka hanciem hi.
17 Kum tampi zaw ciengin ka minamte kungah huna sum puoh ding le biehna lui dingin tu-a ang kuon ka hi hi.
18 Amate in biehinnpi sungah tamte bawlin ka op ei mu lai-un mihonpi om lo, buoina zong om vawt loin kisiensuona ziatan ka man zo lien leh amate in kei ei na mu uhi.
19 Hizongle Asia gam pana ang pei Jew mite pawlkhat zong a om vua,
19 amate in kei tungah mawsah ding thu khatpo ei nei uleh hing pei-in na mai-ah ei mawmatna uh thu ang sun ding uh a kilawm hi.
20 Ahi sihle zong biehna uliente mai-a ka din lai-in tam mite in keima tungah bang khielna mu uh ahei ci gensah inlen,
21 amate mai-a ka din lai-in, ‘Misite thawkiana thu tawh kisai-in tuni-in na mai vuah thusitna ka thuoh hi,’ ci-a ka kiko pen ahi lo buong leh bangma om lo hi,” a ci hi.
22 Hinanle Lampi thu a theizaw Felix in a thu khen ding sot to a, “Galkapmangpa Lysias ang tun ciengin keima in na thu uh kang khenpieh ding hi,” ci-in a gen hi.
23 Tua ciengin galkap bupa in ama a cin nadingin thu pie a, hinanle ama in phabep cieng khat suotahna a pieh nading le a kisapnate a en nuom a lawmte khatpo a kham lo nadingin zong thu a pie hi.
24 Ni bangza ahei khat a sawt zaw ciengin Felix in Judah numei khat ahi, a zi Drusilla tawh pei-in Paul hlansah a, Jesu Khris upna thu a gen a ngai uhi.
25 Paul in dihna thu, pumpi kidehzawhna thu le ang tung ding thukhenna thute a kuppi ciengin Felix zau a, “Tu-in pei phot inlen hun lem ka nga ciengin kang hlansah kia ding hi,” a ci hi.
26 Khum hun ma-in Paul in sum ei pie kha leh ci lametna tawh ama hlan thimthemin hopi zel hi.
27 Kum ni a cin zaw ciengin Felix’ za laihin Porcius Festus pang a, Felix in Judah-te’ maipha a mu nop ziehin thong kiasa-in Paul a nuasie hi.
