Paul in Kumpipa Kungah Thukhang
25
1 Tua gam a tunzaw ni thum ciengin Caesarea khuo panin Jerusalem ah Festus peito a,
2 tua munah siempu uhpite le Judah makaite in Paul a mawmatna thu uh ama kungah na sung uhi.
3 Amate a angvanna-in Jerusalem ah Paul a puoh nadingin Festus kungah ngenin a thum uhi. A tahtahin amate in lamkalah ama a tha sawm uh ahi bo hi.
4 Festus in zong, Caesarea ah Paul kikhum a, kei mama zong tua munah a sawt loin pei ka sawm hi, ci-in a dawng hi.
5 Tuaci’n ama in, “Na thunei uliente utawh ei peisuhsah unlen tampa tawh kisai-in khielna khatpo a op leh kimawmat ta uheh,” a ci hi.
6 Amate lahah ni giet ahiei ni sawm ahiei sanga a tamzaw lo khat a tam zaw ciengin Caesarea khuo-ah a peisuh hi; a zing ni ciengin thukhenna topha tungah to a, ama in Paul a kipeipi nadingin thu a pie hi.
7 Paul a tun ciengin Jerusalem pana a peisuh Jew mite in a imtawm pai vua, amate in teci tawh a lah thei lo uh mawsietna thulien tampite tawh ama a mawmat uhi.
8 Paul in a kisutna ah, “Jew mite’ thukham tungah hile, biehinnpi tungah hile, kumpipa tungah hile bangma khielna ka bawl sih hi,” a ci hi.
9 Ahi vangin Festus in Jew mite’ maipha a nga nuom ziehin Paul kungah, “Tami thu tawh kisai-in keima mai-ah thusit dingin Jerusalem ah nang peito nuom ei mah?” ci-in a dong hi.
10 Paul in, “Kumpipa’ thukhenna topha mai-a a ding ka hi hi; tam mun pen thu ei kisit nadinga a kilawm mun ahi hi. Nang in nei thei siem ma bangin Jew mite tungah khielna bangma ka bawl sih hi.
11 Tu-in kei ka khiel khah a, si nading lawm bawlkhiel ka nei leh, sina tawh kipel thei nadingin ka hanciem sih ding hi; ahi vangin ei mawmatna uh a dih lopi ahile koima in amau’ khut sungah ei ap thei tuon sih ding hi. Kumpipa kungah ka thu ka khang hi,” a ci hi.
12 Tua ciengin ama’ upa vaihawmte tawh a kikup zaw ciengin Festus in, “Kumpipa kungah na thu na khang zo hi; kumpipa kungah na pei ding hi,” a ci hi.
Festus in Kumpi Agrippa Thukum
13 Ni tampi zaw ciengin Festus dawn dingin Caesarea khuo-ah Kumpi Agrippa le Bernice a tung uhi.
14 Tua khuo-ah ni tampi a taam zaw ciengun Festus in kumpipa mai-ah Paul’ thu sung a, “Felix in thong sunga a tapnuasie mi khat tanah a om hi.
15 Jerusalem-a ka om lai-in siempu uhpite le Judah upate in kei kungah ama’ thu ei ko vua, a thu ei khenpieh in, ci-in ang thum uhi.
16 Keima in amate kungah, “Mawsahna a thuohte in a mawsahte tawh kimaituo-in a kimawsahna thu a phel thei nadingin hun lemtang khat a nga masangsie, a mawsahte’ khut sungah mi khatpo ap ding pen Rome ngaina hi lo hi, ci-in amate kungah ka gen hi.
17 Tuaci’n tam munah amate kimu-in a zing ciengin thukhenna topha tungah to pai-in, tua mipa ang kipeipi nadingin thu ka pie hi.
18 A mawsahte ang din ciengun ka upmaw bang loin mawmatna bangma a gen tuon sih uhi.
19 A kithutu pen uh ahile a biehna vai ule a sisa kimlai Paul in hingkia ta, a ci Jesu’ tungtang guol bep no khat na hi lel hi.
20 Tami dawhnate bangci kantel ding ci thei lo ka hi ziehin Jerusalem ah pei-in tua tahah thusit ding na nuom eimah, ci-in ama ka dong hi.
21 Ahi vangin Paul in a Vanglien Kumpipa khen dingin thu khang zo ta ahi ziehin, ama kumpipa kunga ka puoh zo masangsie thong sunga khum phot dingin thu ka pie hi,” a ci hi.
22 Agrippa in Festus kungah, “Kei mama in tami pa thu ka za nuom hi,” a ci ciengin, “Zing ciengin ama’ thu na za ding hi,” a ci hi.
Agrippa Mai-ah Paul Kipeipi
23 Tuaci’n a zing ciengin Agrippa le Bernice-te thupitah le kiliensah tahin ang pei vua, kumpi galkapmangte le khuo sunga mi thupite tawh mipi kikhopna inn sungah ang lut uhi. Tua ciengin Festus in thu pie a, Paul kilutpi hi.
24 Tuale Festus in, “Kumpi Agrippa le kote tawh tana om mi zosie aw, Jerusalem khuo sung le tami khuo sungah a sawt hin dingin kilawm lo hi, ci-in Judah mi zosiete awngin kei kunga ang nget uh ahi tam mipa note in na mu uhi.
25 Ahi vangin a sina za va-ia dingin ke’n a gamtat khielna bangma ka mu sih hi; ama in a Vanglien Kumpipa tungah a thu khang zo ta ahi ziehin ama peisah dingin ka khensat zo hi.
26 Ahi vangin thunei pen pa tungah ama’ thu ka giel ding a kicien bangma ka nei sih hi. Tua ahi ziehin na mai vuah ama kang puoh a, ama thu i sit zaw ciengin giel ding thu pawlkhat nei kha leng cina tawh, adiehdiehin nang Kumpi Agrippa kunga kang puoh ahi hi.
27 Azieh pen a kimawsahna thu bang teng ahei, ci gen lopi-in thongkie mi khat mawh hla ding ci pen kei adingin a thu kicingtah ka sa zo sih hi,” a ci hi.
