Agrippa Mai-ah Paul Kisut
26
1 Agrippa in Paul kungah, “Na thu na gen thei nading phalna kang pie hi,” ci-in a gen ciengin Paul in a khut zahin a kisutna ding thu a gen hi:
2 “Kumpi Agrippa aw, tuni-in ahile na mai-ah Jew mite’ ei mawsahna thu zosie ka kisutna ding thu gen ding ka hi tah ziehin hampha ka kisa hi.
3 Azieh pen nangma in Jew mite’ ngaina zosie le a kikalna uh thu zosie na theicien deudeu hi. Tua ahi ziehin ka thugente lungduoi taha nei ngaipieh nadingin kang thum hi.
4 “A cila patin Jerusalem khuo ka mipite lahah hinkhuo ka na zang a, ka khangno lai-a kipanin Jew mite zosie in keima’ hindan ei na theisiem uhi.
5 Ka biehna sung vuah a khau penpen ahi Pharisee pawl ka hi lam le ka hindante teci a pan nuom uleh a sawtpi lai-a kipanin a theisa uh ahi hi.
6 Pasien in ka pu ka pate uh a na pieh kamciem ka lamet ziehin tu-in tam munah thusitna thuoha a ding ka hi hi.
7 Minam sawm le nite in tuami kamciem nga dinga a kilamet ziehun sun le zanin kukal tahin Pasien a na bie mielmuol uhi. A Lien Mangpipa aw,a tami lametna thu zieha Jew mite in kei ei mawmat uh ahi hi!
8 Note khatpo in Pasien in misite thosah hi, ci thu bang dinga uphuoi lo-a na ngaisut uh ahei?
9 “Kei mama in Nazareth mi Jesu’ min langpanga na tampi sep ding kilawm hi, ci-in ka na ngaisun ngai hi.
10 Keima in tua bangin Jerusalem ah ka na sem pai hi; siempu uhpite’ phalna tawh misiengtho tampi tahte thong sungah ka khum banah amate si nading thu a kikhen ciengin zong thukimna me ka na pie lai hi.
11 Zawthaw thu tawh Pasien a gensiet nadingun kikhopna inn zosie-ah amate tamveipi dan ka pie hi; amate tungah lungthah luo ka hi ziehin gamdang khuopite lah nangawnah amate ka sulzui hi.
Paul in a Kikhelna Thu Gen
12 “Tam thu lungsimah kuo kawmin siempu uhpite’ thuneina le sawlna tawh Damascus ah ka va zin ta a,
13 a Lien Mangpipa aw,b sunkim pawl lampi-a ka pei laitahin keima le ka zawpite kimvelah ni sanga a tangzaw khuovah khat vantung panin ang tang ka mu hi.
14 Ka unpi-un lei lahah ka puasuh ciengun Hebrew hamc tawh, ‘Saul, Saul aw, bang dinga nei bawlsiet ahei? Keng tawh ciengzum khat sui lacin nangma kiliemsuo na hi lel hi,’ ei ci aw khat ka za hi.
15 ‘Topa aw, nang koi na hei?’ ci-a ka dawh ciengin Topa in, ‘Na bawlsiet pa Jesu ka hi hi.
16 Ahi vangin tho inlen na keng tawh ding in; bangzieh ahei cile nang in keimad sunga na musa nate le na tunga keima kang kilah lai nading thute a sem ding le teci a pang dinga kang se zieha na kunga ang kilah ka hi hi.
17 Amate kunga kang sawl nading ahi na mite le Gentile-te’ khut sung panin nangma kang hunkhie ding hi.
18 Khuomiel sung panin khuovah sung le Satan’ vanglietna panin Pasien lamah Gentile-te a kihei ziehun a mawnate uh a kimaisah thei nading le, keima sunga om a upna ziehun amate in a kisiensuosa mite lahah mun a nga thei nadingun, a mit uh a honpieh dingin nangma kang sawl ding hi,’ ei ci hi.
A Thuhilna Paul in Gen
19 “Tua zaw ciengin Kumpi Agrippa aw, vantung mangmuna thu mang loin ka om sih a,
20 ahi vangin amate kisiakia-in Pasien lam ang kihei nading ule kisiakiana tawh a kituoh gamtatnate ang lah nadingun, a masa penin Damascus khuo, tua zaw ciengin Jerusalem khuo, Judea gam teng le Gentile-te kungah zong ka tangko hi.
21 Tami thu hang tawh Jew mite in biehinnpi sungah kei ei manin ei tha sawm uhi.
22 Keima in Pasien kung panin huna ka nga a, tuni cieng dongin tam munah dingin, a neu a lien tungah teci ka pang a, bangma dang gen loin Moses le kamsangte in ang pieng ding hi, ci-a a gensa uh thu ma ka gen hi:
24 Ama in tami a kisutna thu a gen laitahin Festus in, “Paul aw, nang mimaw na hi hi! Na pilna tampi sinna in nang ang lemotsah ta hi!” ci-in nahpitahin ama a kiko hi.
25 Hizongle Paul in, “Hoi tungtuong Festus aw, kei pen a maw ka hi malmal sih a, pilvang taha thuman thutah gen ka hizaw bo hi.
26 Kumpipa in tami thute na thei tahtah ziehin nop bangbangin kang gen ahi hi; azieh pen tami thute khat mama zong a kidapbawl hi valawh lo ahi ziehin na thei khah lo om lo dingin ka um hi.
27 Kumpi Agrippa aw, kamsangte na um ei mah? Na up lam ka thei hi,” a ci hi.
28 Agrippa in Paul kungah, “Hun tomno khat sungin Tapidaw suoh dinga ei zawl na hi amah?” a ci hi.
29 Paul in, “Hun a tom a, a sau zongin nang beh hi loin tuni-a ka thugen a ngai mi zosiete in tami siakol bulnate ci longal ah kei ei bah kim nading vua Pasien kunga thu ngen ka hi hi,” a ci hi.
30 Tua ciengin kumpipa le uhpi pa a dingto vua, tuale Bernice le a topi mite zong a ding uhi.
31 Amate a peikhiet zaw ciengun, “Tam pa in si nading le thongkieh nading za-in bangma bawl lo hi,” khatlekhat a kici uhi.
32 Agrippa in Festus kungah, “Tam pa in kumpipa tungah a thu a na khang zo nai lo khat hi leh kihla thei lel ma hiven,” a ci hi.
