Rome ah Tembaw tawh Paul Pei
27
1 Italy gamah tembaw tawh ka pei ding uh thu a kikhensat zaw ciengin amate in Augustus galkap honte lahah zakhat a uh Julius kici galkap bupa’ khut sungah Paul le thongkie dang pawlkhatte a ap uhi.
2 Asia gam tuipi dung teng pei dinga a kisa Adramyttium tembaw tungah tuongin tuipi tungah ka om vua, Thessalonica pana ang pei Macedonia mi khat ahi Aristarchus in zong ko ei zui hi.
3 A zing ciengin Sidon khuo ah ka tung uhi; Julius in Paul na limbawl mama a, ama’ tasapnate a et thei nadingun a lawmte kungah ama a hawsah hi.
4 Tua khuo panin tuipi tungah ka peikia vua, hui ang lelan ziehin Cyprus tuikul kiliesahin ka pei uhi.
5 Cilicia le Pamphylia gam gala om tuipi ka kantan zaw ciengun Lycia gama om Mura khuo ka tung uhi.
6 Tua munah zakhat a uh galkap bupa in Italy lam zuon ding Alexandra tembaw khat mu a, tua tungah ei tuongsah hi.
7 A muon muon no-in ni tampi sung ka pei vua, hamsapi-in Cnidus khuo ka pautun uhi. Tuale hui ang lelan ziehin Crete tuikul ka kiliesah vua, Salmone galah ka pei uhi.
8 Hamsapi-in tuipi gei zui-in ka pei vua, Lasea khuopi gei Khawlmun Nuom kici mun ka tung uhi.
9 Antan hun a tawp zo zieh le tuipi tung khuolzinna a zauhuoi ziehin Paul in,
10 “Siete aw, i tuipi khuolzinna-ah tuohsie-in supna tampi om ding a, tembaw le i van puohte uh i sup ban vuah i hinna uh i tanlaw ding uh zauhuoi hi, ci ka mu thei hi,” ci-in amate tungah ngaisutna a pie hi.
11 Ahi vangin galkap bupa in Paul’ thugen sangin tembaw uhpa le tembaw nei pa’ thu a mangzaw hi.
12 Phalbi hun sunga op nadingin tua tembaw khawlna pen mun gina ahi seng lo ziehin tua mun panin Phoenix tembaw khawlna i tun zawh khah uleh tua munah tamin phalbi hun i mang ding uhi, ci-in mi a tamzawte’ deina tawh a pei suoh uhi. Tua mun pen leilu nisuona le leitaw nitumna lam a maingat Crete tuikul tembaw khawlna mun ahi hi.
Tuipi Tungah Huipi
13 Leitaw lam hui ang lan hiauhiau ciengin a tupna uh a tung zo-in kingaisut uh ahi ziehin tembaw khina siakawi bot dawhin Crete tuikul pangzui teng nehin khuolzin a kipan uhi.
14 Ahi vangin a sawt loin Crete tuikul lam panin sah-nisuo a kici huipi hat mama khat ang langsuh hi.
15 Hui in tembaw sem gawpin maiphu zo ta lo ahi ziehin hui lanna lamlamah ka pei mawh ta uhi.
16 Caudaa a kici tuikul neu khat in kiliesahin ka tai laitahun tembaw’ gunkuong a siet lo nadingin ka hu zo paupau uhi.
17 Amate in tembaw tungah gunkuong a kaito zaw ciengun tembaw a kip nadingin khauhuol tawh a gah uhi. Syrtis sehtalte a phuh khah ding a zau ziehun siakawi khaisa-in hui in tembaw a tawsah uhi.
18 Huipi in ei nah sem gawp ta ahi ziehin a zing ciengin amate in tembaw vante paimangin,
19 a ni thum ni-in tembaw’ vanzahte a khut utawh a paimang uhi.
20 Ni tampi sung ni le aasite ang dawh nawn loin huipi ang hat semsem ciengin, kote in suotah nading lametna kici zosie ka nuasie ta uhi.
21 Sawtveipi an ne loin a op zaw ciengun amate lahah Paul dingin, “Lawmte aw, ka thugen ei mangin Crete tuikul pana a peikhie lo hi poma leih tam sietna le supna tawh i kipel ding hi.
22 Tu-in kilungkhausah un, azieh pen tembaw khat simlo note lahah mihing a si koima na om sih ding uhi.
23 Bangzieh ahei cile tuzanin keima ei nei le ka bieh Pasien’ vantungmi khat ka gei-ah ang ding a,
24 ‘Paul aw, zau malmal sin; kumpipa mai-ah na ding valon ding hi; tuale Pasien in tuipi tunga nangma le na zawpite zosie tungah bihna ang pie zo hi,’ ei ci hi.
25 Tuaci’n lawmte aw, kilungkhausah un, azieh pen ei kigensa bangin ang pieng tahpi ding hi, ci-in Pasien sungah upna ka nei hi.
26 Ahi vangin tuikul tung khatah i tung teitei ding uhi,” a ci hi.
27 Huipi in ei mut ziehin Adria tuipi tungah ka lam kawikawi laitah uh a zan sawm le lina zankim pawlin tembaw nasemte in lei tawh i kinai ta hi, ci-in ang ummaw uhi.
28 Tuaci’n amate in tuithuhna ang te uleh lam sawm ni bang thuh hi, ci-in ang mu uhi; bano khat zaw ciengin ang tekia uleh lam sawm le lam nga a thuh hi.
29 Suongtum ka phuh khah ding uh ka zau ziehun tembaw nua lamah tembaw khawlsahna siakawi li ka khiesuh vua, zingmawng khuovah nading thu ka ngen uhi.
30 Hizongle tembaw tung panin tembaw nasemte daptai sawm uh ahi ziehin tembaw khawlsahna siakawi a khiesuh kinei-in tuipi sungah gunkuong a khie dap uhi.
31 Tuale Paul in mi zakhat uh galkap bupa le galkapte kungah, “Tam mite tembaw sunga a op sih uleh, no zong na suohta zo sih ding uhi,” a ci hi.
32 Tua ciengin galkapte in gunkuong khina khauzamte attanin tui sungah a khiesuh uhi.
33 Khuo vah kuon ciengin Paul in amate zosie an ne dingin sawl a, “Tuni pen patau-in bangma an ne loin na om zaw uh a ni sawm le ni li a cin ni ahi ta hi.
34 Tua ahi ziehin an halkhat ne teitei bo un, kang thum hi, azieh pen tua in note ang hinsuo ding hi; bangzieh ahei cile note khat beh in na samzam khat zong na mansuo sih ding uhi,” a ci hi.
35 Ama in tam thu a gen zaw ciengin khomun a la hi; tuale mi zosie’ mitmu-in Pasien kungah nuomthu tut a, ama in phalsuo-in a ne dingin a kipan hi.
36 Tua ciengin amate zosie zong a lung uh ang nuom a, an a ne ciet uhi.
38 An khamtahin a neh zaw ciengun tembaw a zan nadingin tuipi tungah mangbu vuite a pai uhi.
Tembaw Kisietna
39 Zingmawng ciengin leitung bang mun tung ci a thei sih vangun amate in tuipi pieuzang khat a mu vua, ahi thei leh tua munah tembaw khawlsah dingin a gel uhi.
40 Tuaci’n tembaw khina siakawipi a khiesuh vua, tuipi sungah tuate a nuasie uhi. Tua hun sung ma-in amate in tembaw hawlna’ a khina khaute a sut dawh vua, huipi in mutin tuipieu lam a pei thei nadingun a mailama tembaw puon a khaisang uhi.
42 Ahi vangin tuihuol ni in a tetuona muna om sehtal khosang khat a phuh khah ziehin leitungah tembaw a kinga ta hi. Tembaw’ a malam teng tumin a pia thei ta sih a, ahi vangin tuihuol in a nualam a satkeh gawp hi.
42 Galkapte’ gelna pen thongkiete khat mama in tui ngapin a suotah lo nadingun amate tha sawm ahi uhi.
43 Hinanle mi zakhat a uh galkap bupa in Paul a suohtahsah nuom ziehin a ngimna bang vua a bawl lo nadingun amate a kham hi. Ama in tuingap theite tui sungah leng masa-in galkai-in,
44 tuale a om lai teng singpehte tung po le tembaw van them tung po-ah tuongin a pei nadingun thu a pie hi. Tua bangin leitungah mi zosie galkai-in a suohta kim uhi.
