Peter in Khutdawngen Khelbai Khat Damsah
3
1 Ni khat, nitah lam nai thum thunget hunin biehinnpi ah Peter le John-te a peito uhi.
2 Tuale a pienpi khelbai khat na kipuo hi. Tua pa in biehinn kai mite tung panin sum a nget thei nadingin mite in Kotpi Hoi kici biehinn tunkot gei-ah nisielin ama a koi uhi.
3 Biehinnpi sungah Peter le John a lut kuonun tua pa in mu a, ama gel kungah sum a ngen hi.
4 John ma bangin Peter in zong tua pa encien a, “Ko gel ei en vawi” a ci uhi.
5 Tua pa in zong bang khat nga ding ci kinepna tawh ama gel a lim-et mama hi.
6 Ahi vangin Peter in, “Ngun le kham ka nei poma sih hi, hizongle ka nei pen kang pie hi; Nazareth mi Jesu Khris’ min tawh ding inlen lam pei in,” a ci hi.
7 Ama in tua pa a zietlam khut tawh manin a kaito leh thakhatin a keng le a sietmitte a khaupai lien hi.
8 Ama kitomin dingto a, lam pei pai-in amate tawh biehinnpi sungah lut a, a lam pei kawmin dieng vazawhin Pasien min’ a phat hi.
9 Mi zosie in ama lam pei-in Pasien a phat a mu vua,
10 tuale ama pen biehinnpi’ Kotpi Hoi gei-ah to-in sum ngenngen pa ahi lam amate in a thei uhi; tuale ama tunga a pieng thute ziehin amate in lamdang sa-in a lungmang uhi.
Solomon Talap-ah Peter in Thugen
11 Tua mipa in Peter le John a tuhdet laitahin mi zosie in lamdang a sa vua, amau’ opna Solomon Talap a kici innhlim lamah tai-in a kikhawm uhi.
12 Peter in a mu ciengin mipite kungah, “No Israel-te aw, tam mipa lam ka peisah theina uh pen ka vang ule ka hoina uh zieh sa-in bang dingin ei cien-et na hi uh ahei?
13 I pupite ahi Abraham, Isaac, le Jacob-te’ Pasien in a nasempaa Jesu a minthangsah zo hi. Tua pa pen Pilat in hla dingin a khensat vangin note in ama na niel vua, Pilat mai-ah tha dingin na pie ta uhi.
14 Note in a Siengtho le Midih Pa na niel vua, mithat pa khat a hla nadingin na ngen zawsop uhi.
15 Note in Hinna a piengsah pa na that vua, hizongle Pasien in misite lah panin ama a thosah hi. Tam thu-ah kote teci ka hi uhi.
17 “Tu-in lawmtec aw, na makaite un a na bawl bangin note in zong na thei lo ziehun na bawlkhah lam uh ka thei hi.
18 Ama’ Messiahd in gimna thuoh ding hi, ci-in kamsangte zosie tung panin a na magensa thute Pasien in tam bangin a tangtungsah zo hi.
19 Tua ahi ziehin na mawnate uh a kiphietmai thei nadingin kisiakia-in Pasien lamah kihei un.
20 Tuaci’n Topa kung panin tha tha ngana hun ang tung ding a, ama in note dinga a kisekholsa Messiahe ahi Jesu ang sawl ding hi.
21 Pasien in a kamsang mi siengthote tungtawnin a tangko bangin na zosie a kibawlthakia hun masangsie vantungah Jesu a op kul ding hi.
22 Moses in, ‘Topa na Pasien un na mitef panin note adingin keima tawh kibang kamsang khat ang piengsah ding hi. Ama in na kung vua ang gen popo note in na man ding uh ahi hi.
23 Tua kamsangpa’ thugen a mang lo poma a mite lah panin kiphungkal ding hi,’ a ci hi.
24 Samuel a kipanin a nua-a ang pieng kamsang zosie in zong tuhun thupiengte a na genkhol tabo uhi.
25 Note pen kamsangte le Pasien in na pu na pate uh tunga a na pieh thuciemna’ suonlehlahte na hi vua, tuaci’n ama in Abraham kungah, ‘Na suon na hlahte sungah leitung innkuon zosie thupha kipie ding hi,’ a ci hi.
