Biehna Uliente’ Mai-ah Peter le John
4
1 Mipite tungah Peter le John in thu a gen laitahun ama gel kungah siempute, biehinn uhpa, le Sadducees-te a pei uhi.
2 Ama gel in Jesu sungah misite thawkiana om hi, ci-in a gen zieh gelin nawngkai a sa mama uhi.
3 Tuaci’n amate in Peter le John a man vua, nitah lam hi ta ahi ziehin a zing cieng dong thong sungah a khum uhi.
4 Ahi vangin thungaite lahah mi tampi in a um vua, thu um mi tul nga bang a pha uhi.
5 A zing ciengin Jerusalem ah a gam-uhte uh, upate, le thukham hil siete a kikhawm uhi.
6 Tua sungah siempu lien Annas, Caiaphas, John,a Alexander, le siempu liente’ innkuonpi zosie zong a om uhi.
7 A laikim vuah thongkie tegelb dingsahin, “No gel in bang thuneina le bang min tawh tami na bawl uh ahei,’ ci-in a dong uhi.
8 Tua ciengin Hlagau Siengtho tawh Peter kidimin amate kungah, “Gam uhte le upate aw,
9 tuni-in cina pa khat tunga sil hoi ka bawl ziehun tam pa bangci banga a natna dam thei ahei, ci-in ei dong na hi uleh,
10 note zosie le Israel-te zosie in kithei ta un. A dam sienga na mai vua ang ding tam mipa pen singlamte tunga na khailia uh, Pasien in misite lah pan a thawsahkia pa Nazareth mi Jesu Khris’ min zieha dam ahi hi.
11 Tami Jesu pen,
‘No innlamte in na nildawh uh suong,
innkiu suong bulpi a suoh hi,’ kici pa ahi hi.
12 Midang koima khat beh sungah hutdamna a om sih hi, azieh pen vansin nei-a a om mihingte lahah i kihutdamna nadinga kipie min dang khat zong a om sih hi,” a ci hi.
13 Tu-in amate in Peter le John pen sinna nei vawt lo mi maimai hi lel napi uh, amau’ hangsanna a mu ciengun lamdang a sa mama vua, Jesu tawh kithuo ngaite ahi lam uh zong a phawh uhi.
14 Ama tegel’ gei-ah damna nga pa dingin a om a mu ciengun amate in langpan nading thu bangma a gen thei ta sih uhi.
15 Tuaci’n khatlekhat tam thu a kikup sungun biehna uliente kung panin a peikhiet nadingun thu a pie uhi.
16 Amate in, “Tam mite bang law ding i hei? Bangzieh ahei cile amate tungtawnin a kilang mama lim khat a pieng zo hi, ci thu Jerusalem khuo-a tengte zosie in cientahin a thei ta vua, eite in zong tua thu i niel thei sih uhi.
17 Ahi vangin mite lahah tam thute a kizelthang nawn lo nadingin, tulang kalsie koima kungah tami min tawh thu a gen nawn lo nadingun amate thu pie vai,” a ci uhi.
18 Tuaci’n ama gel hlanin Jesu’ min tawh thu genin thu a hil nawn lo nadingun thu a pie uhi.
19 Ahi vangin Peter le John in, “Note’ thu manzawh ding le Pasien’ thu manzawh ding, Pasien muna-ah koi manzaw ding ahei, ci noma ma in khensat un.
20 Bangzieh ahei cile kote in ka musa ule ka zahsa uh thute gen loin ka om thei sih uhi,” ci-in a dawng uhi.
21 Amate in mipite ziehin ama gel dan pieh nading lampi a mu lo ziehun a galgih zaw ciengin a hlakia uhi. Bangzieh ahei cile a pieng thute ziehin amate in a unpi-un Pasien a phat uhi.
22 Azieh pen tami damna lim lamdang a kibawlna mipa pen a khan kum sawm li val pha zo hi.
Thu umte in Hangtahin Thu Ngen
23 Ama gel a kihla zaw ciengin a guolte kungah pei-in siempu uhpite le upate in ama gel kunga a gen uh thu zosie a zasah uhi.
24 Amate in tua thu a zah ciengun a aw uh sangsahin Pasien kungah thu a ngenton vua, “Vanpi le leipi, tuipi, le tua teng sunga a om sil bangkim a siem Thunei pen Topa aw,
25 nang in na nasempa ka pu uh David tung panin Hlagau Siengtho tawh thu na gen a:
‘Bang dingin Gentile-te lungthahin,
bang dingin mite in
thu mawhnate ngaisun uh ahei?
leitung kumpite in panmun la-in,
gam uhte kikhawm zo uhi,” na ci hi.
27 Azieh pen Herod le Pontius Pilat in Gentile-te le Israel-te tawh na sathau nusa pa, a siengtho na nasemd Jesu langpang dingin tam khuopi sungah amate a kikhawm uhi.
28 Nangma in na gelna bangin a pieng dinga na khut tawh na sekholsa popo amate in a sem ding uhi.
30 Cinate dam nadingin na khut zah inlen, a siengtho na nasempaf Jesu’ minin lim le na lamdangte kibawl heh,” a ci uhi.
31 Amate in thu a nget zaw ciengun a kikhopna mun uh a kiling hi; amate zong a unpi-un Hlagau Siengtho tawh kidimin Pasien’ thu hangsan tahin a gen uhi.
Thu umte in Neisate Zangton
32 Tu-in thu um mite a lungsim le a ngaisutna uh a kikhat vua, tuaci’n koima in a a neisa khat popo kei-a’ tuom ci loin neisa zosie a neiton uhi.
33 Sawltahpite in vanglietna lienpi tawh Topa Jesu’ thawkiana thu teci a pang vua, amate zosie tungah Pasien’ hepina lienpi a tung hi.
34 A neisa uh inn le lote zua-in a nga uh sumte a tawi ciet ziehun amate lahah a tasam koima a om sih hi.
35 Amate in sawltahpite keng zungah tua sumte koi-in a kisapna dung zui-in mi zosie a hawmpieh uhi.
36 Cyprus khuo-a pieng, Joseph kici Levi-te khat, sawltahpite in Barnabas (Hanthawn Siempa’ Tapa a cinopna) a ci uh mipa khat a om hi.
37 Ama in a neisa logam khat zua-in a sum teng peipi-in sawltahpite’ keng phungah a koi hi.
