Saul in Pawlpi Bawlsie
1 Tua ni-in Jerusalem ah hlattuom pawlpi bawlsietna lienpi kipan a, sawltahpite simlo mi zosie, Judea gam le Samaria gam mun zosie-ah a kithethang uhi.
2 Pasien’ thu-a kipumpieh mite in Stephen a vui vua, ama ziehin nahpi tahin a kap uhi.
3 Hinanle inn khat zaw inn khatah Saul lutin hlattuom pawlpi susie a, numei le pasalte kaiphitin thong sungah a khum hi.
Samaria ah Philip in Thugen
4 Tu-in a kithethang mite mun khat pan mun khatah a vah kawikawi vua, Pasien’ thu a tangko uhi.
6 Mihonpi in Philip’ thugente za-in, a na lamdang bawlte a mu ciengun lungsim kikhatin a thu gente lawptahin a ngai uhi.
7 Azieh pen dawivei mi tampite sung panin hlabua nei mite a awng vagua uhi; tuale amate zong pusuohin phalsi le khelbai mi tampi in damna a nga uhi.
8 Tuaci’n tua khuopi sungah kipahna lienpi a om hi.
9 Tuami khuo sungah Simon kici mi khat om a, ama in ni dangin mitphiel lahin, Samaria mite a na cizasah mama a, kei zong mi thupi khat ka hi hi, na kici hi.
10 Amate in a neupen panin a golpen dongin a unpi-un a thugen lawptahin a ngai vua, “Tam pa khu Vanglienpa a kici Pasien’ vanglietna ahi hi,” a ci uhi.
11 Ama in a mitphiel tawh hun sauveipi sung amate lamdang sasah ahi ziehin amate in a thugen lawptahin a ngai uhi.
12 Ahi vangin amate in Pasien’ manggam lungdamna thu le Jesu Khris’ min a tangko Philip a up uh ciengin a numei pasalin a ki-baptize uhi.
13 Simon mama nangawn in zong a um hi. A ki-baptize zaw ciengin Philip kungah ama om den a, a pieng limte le na lamdang lienpite a mu ciengin lamdang a sa mama hi.
14 Samaria-te in Pasien’ thu sang thei ta uhi, ci thu Jerusalem-a om sawltahpite in a zah ciengun amate kungah Peter le John a sawl uhi.
15 Ama gel peisuhin Samaria-te in Hlagau Siengtho a nga nadingun thu a ngetpieh uhi.
16 (azieh pen amate khat beh tungah Hlagau tungb nai lo hi. Amate ahile Topa Jesu’ min beh tawh a ki-baptize zo pan ahi na bo uhi).
17 Tua ciengin Peter le Johnc in amate tungah khut a nga vua, tuale amate in Hlagau Siengtho a nga uhi.
18 Sawltahpite’ khut ngahna tawh Hlagau a kipieh lam Simon in a mu ciengin ama gel tungah sum lui-in,
19 “Mi khatpo tunga khut ka ngah ciengin Hlagau Siengtho a nga thei nadingin tami vanglietna kei zong ei pie gel in,” a ci hi.
20 Ahi vangin Peter in ama kungah, “Sum tawh Pasien’ letsong nga sawm na hi ziehin na sum tawh mangthaiton in.
21 Pasien mai-ah na lungtang dih lo ahi ziehin tami thu-ah na kihal thei sih a, tanh zong na nei sih hi.
22 Tua ahi ziehin tami na gitlona panin kisiakia inlen Topa kungah thu ngen in. Ama in na lungsim sunga na ngaisutna ang maisah thei kha ding hi.
23 Bangzieh ahei cile sinkha bangin na lungsim zong kha a, gitlona in nang ang kanbawm lam ka mu hi,” a ci hi.
25 Tu-in Peter le John in teci pangin Topa’ thu a gen zaw cieng gelin Jerusalem khuopi ah kilekia-in Samaria khuo tampite-ah lungdamna thu a tangko uhi.
Philip le a Kiget Ethiopia Mangpa
26 Tua ciengin Topa’ vantungmi khat in Philip kungah, “Tho inlen Jerusalem pan Gaza lam zotna leitaw lamah va pei ta’n,” a ci hi. (Tua khu senel gam lampi ahi hi.)
27 Tuaci’n ama zong tho-in a pei pai hi. Khumin Ethiopia kumpinu Candace’ khut nei-a vaihawm mangpa le kumpinu’ gou zosie a uh cilgesa Ethiopia mangpa khat a om hi. Pasien bie dingin Jerusalem khuo ah ama a pei hi.
28 A kilekia ciengin a sakol leeng tung tuong kawmin kamsang Isaiah’ laibu a sim hi.
29 Tua ciengin Hlagau in Philip kungah, “Pei inlen tami sakol leeng zui in,” a ci hi.
30 Tuaci’n Philip zong tua pa kungah tai phei a, kamsang Isaiah laibu a sim a za hi. Ama in, “Tua na laisim a thu na telsiem ei mah?” ci-in a dong hi.
31 Ama in, “Ei hil a op sih leh bang ka ci thei ding ahei?” ci-in a dawng hi. Leeng tungah tua pa tuongin ama gei-a to dingin Philip a ciel hi.
32 Tua a lai siengtho mun sim khu tami ahi hi:
“Tha dinga kipeipi tuu bangin ama kipeipi hi.
A mul metpa mai-ah a ham lo tuuno bangin
ama in a kam a kah sih hi.
33 Ama a kiniemkhieh ziehin
ama tungah thutang kizang lo hi.
Ama’ khanggui koi in sut thei ding ahei?
Azieh pen leitung panin ama’ hinna kila zo hi,” a ci hi.
34 Cilgesa Ethiopia mangpa in Philip kungah, “Thu khat hing dong vang, tami kamsangpa ama le ama kigen amah, ahi sihle midang khat’ thu gen hizaw ahei?” ci-in a dong hi.
35 Tua ciengin Philip thugen kipan a, tua a lai siengtho simna mun panin ama kungah Jesu’ thu ahi lungdamna thu a tangko hi.
36 Lampi-ah amate a pei laitahun tui opna mun khatah a tung uhi. Cilgesa mangpa in, “En un, tanah tui a om hi! Ka ki-baptize ding bang in ei kham ahei?” a ci hi.
37 Tuale Philip in, “Na lungsim zosie tawh na up leh na ki-baptize thei hi,” a ci hi. Tuale ama in, “Jesu Khris pen Pasien’ Tapa ahi hi, ci-in ka um hi,” ci-in a dawng hi.e
38 Ama in a leeng khawlsah a, tui sungah Philip le cilgesa mangpa a nipi-in a kumsuh vua, Philip in ama a baptize hi.
39 Tui sung panin ama gel a kato ciengun Topa’ Hlagau in Philip a lato hi; tua cilgesa mangpa in ama a mu nawn sih a, tuale ama’ lampi-ah lungdam tahin a pei ta hi.
40 Ahi vangin ama in Azotus khuo-ah Philip mukia a, ama in tua gam teng nawh a, Caesarea a tun dongin khuo zosie-ah lungdamna thu a tangko hi.
