မပြည့်စုံတဲ့ အချစ်အဘိဓါန်
ရိုးရှင်းတဲ့ တောအထာ
လှိုက်မောတဲ့ ရင်ခုန်သံအစစ်နဲ့
ခယချိုသာတဲ့ စကားလုံးတွေကို သုံးပြီး
ငါသူ့ကို ချစ်ခွင့်ပန်ခဲ့တယ်။
နားနဲ့ဆက်ဆက် ကြားချင်ပါသော်လည်း
သူ့ခေါင်းလေးတချက်အငြိမ့်ကို
မေလည်းမောင့်ကို ချစ်ပါတယ်လို့
ကိုယ့်အဘိဓါန်နဲ့ကိုယ် အနက်ဖွင့်ခဲ့တယ်။
ငါနားလည်ခဲ့တဲ့ ချစ်သူဘဝဆိုတာ
လူတွေကြားထဲ အကြည့်ချင်းတချက်ဆုံလို့ ရင်ခုန်ရတာ
လူအလစ်မျာ လက်ကလေးတချက်ကိုင်ခွင့်ရလို့ ချွေးစေးပြန်တာ
အနမ်းတချက်ချွေရဖို့ကြိုးစာရင်း မအောင်မမြင် ရင်မောအိမ်ပြန်လာခဲ့ရတာ။
သူလေးရဲ့အချစ်အပေါ် ယုံကြည်ချက်လည်း လျော့မသွားပါဘူး
ငါ့ရင်ထဲကအချစ်ဟာလည်း လျော့မသွားပါဘူး.. ဒါပေမယ့်
လေငြိမ်လွန်းနေတာ မုန်တိုင်းတခုနီးလာမှန်း
ငါ့အချစ်အဘိဓါန်က အဓိပ္ပါယ်ဖွင့်မပြနိုင်ခဲ့တာသာ ငါ့အမှားဖြစ်ခဲ့တာ။
ခေါင်းလေးတချက်အငြိမ့်ဟာ
အချစ်ကို အောင်မြင်စွာ ရရှိပိုင်ဆိုင်ခြင်းဆိုရင်
ခေါင်းလေးတချက်ခါလိုက်တာဟာလည်း..
သူလေးငါ့ကို မုန်းသွားပြီလား။
သံသယသန္ဓေ ရက်လစေ့သော်
ငါ့ရင်ထဲ ပေါက်ဖွားလာတာက နာကျင်မှု
နာကျင်မှု ကနေ စိမ်းကားမှု
စိမ်းကားမှုကနေ ကွေကွင်းရခြင်း။
အနက်ဖွင့်ရခက်တဲ့ အကြည့်တခုကို
ခါးသီးစွာ ခံစားခဲ့တာ ငါ့အပြစ်
လေစိမ်းတိုက်လို့ သူလေးယိမ်းနွဲ့ခိုက်မှာ
ခိုင်ခံ့တဲ့ ပင်စည်မဖြစ်ခဲ့တာ ငါ့အပြစ်။
နွေးထွေးမှုနှင့် ခံစားချက်တွေ လျော့ပါးနေခိုက်
နှစ်ကိုယ်ကြားက ညဉ့်နက်ချိန် တခဏကို
လေးနက်တဲ့ အချစ်နဲ့ အာရုံဦးရောင်နီသန်းတဲ့အထိ
မစောင့်ခဲ့တာ ငါ့အပြစ်။
Close ကို ပိတ်သည်လို့သာ နားလည်ခဲ့တဲ့
မပြည့်စုံတဲ့ ငါ့ရဲ့ အချစ်အဘိဓါန်
Close ဆိုတာ နီးစပ်ခြင်းလို့လည်း ဆိုလိုမှန်း
မသိခဲ့လေတော့..။
မောင်ခိုင်
